మతం పేరుతో అధికారిపై దాడి చేస్తారా?
కరీంనగర్ పోలీస్ కమిషనర్ను ఉద్దేశించి బీఆర్ఎస్ ఎమ్మెల్యే పాడి కౌశిక్ రెడ్డి చేసిన వ్యాఖ్యలు రాజకీయంగా పెను దుమారం రేపుతున్నాయి. ఈ వ్యవహారంపై ఎంఐఎం అధినేత అసదుద్దీన్ ఒవైసీ తీవ్రంగా స్పందించారు. విధి నిర్వహణలో ఉన్న ఒక ఐపీఎస్ అధికారిపై మతం పేరుతో దాడి చేయడం, అభ్యంతరకర భాషను ఉపయోగించడం అత్యంత విచారకరమని ఆయన మండిపడ్డారు. ఈ వ్యాఖ్యలు ముస్లింల పట్ల కౌశిక్ రెడ్డికి ఉన్న ద్వేషాన్ని బయటపెట్టాయని, మొదటిసారి ఎమ్మెల్యే అయిన వ్యక్తికి ఇలాంటి ఆర్ఎస్ఎస్ భావజాలం ఆవహించడం శోచనీయమని ఒవైసీ ఘాటుగా వ్యాఖ్యానించారు.
పదేళ్ల పాటు ముఖ్యమంత్రిగా పనిచేసిన కేసీఆర్ నాయకత్వంలోని పార్టీలో ఉంటూ, ఒక బాధ్యతాయుతమైన ఎమ్మెల్యే ఇలాంటి ప్రకటనలు చేయడంపై బీఆర్ఎస్ అధిష్టానం ఆలోచించాలని ఒవైసీ హితవు పలికారు. మతం ప్రాతిపదికన అధికారులను కించపరచడం ప్రజాస్వామ్యానికి గొడ్డలిపెట్టు అని ఆయన ఆవేదన వ్యక్తం చేశారు. కౌశిక్ రెడ్డి తీరుపై జాతీయ మీడియాలోనూ చర్చ జరుగుతున్న తరుణంలో, ఒవైసీ చేసిన ఈ వ్యాఖ్యలు రాష్ట్ర రాజకీయాల్లో ప్రాధాన్యత సంతరించుకున్నాయి.
మరోవైపు, త్వరలో జరగనున్న మున్సిపల్, కార్పొరేషన్ ఎన్నికలపై ఒవైసీ తన వ్యూహాన్ని వెల్లడించారు. తమ అభ్యర్థులను మేయర్, డిప్యూటీ మేయర్, ఛైర్మన్ పీఠాలపై కూర్చోబెట్టడమే లక్ష్యంగా ప్రచారాన్ని లాంఛనంగా ప్రారంభించినట్లు తెలిపారు. స్థానిక సంస్థల ఎన్నికల్లో ఎంఐఎం సత్తా చాటుతుందని ధీమా వ్యక్తం చేశారు. ఒకవైపు కౌశిక్ రెడ్డి వ్యాఖ్యలపై నిరసన తెలుపుతూనే, మరోవైపు ఎన్నికల బరిలో తమ బలాన్ని పెంచుకునేందుకు పార్టీ శ్రేణులను సిద్ధం చేస్తున్నట్లు అసదుద్దీన్ స్పష్టం చేశారు.
