భారత్కు పుతిన్
అంతర్జాతీయ రాజకీయాల్లో కీలక పరిణామం చోటుచేసుకోనుంది. రష్యా అధ్యక్షుడు వ్లాదిమిర్ పుతిన్ ఈ ఏడాది సెప్టెంబరులో భారత పర్యటనకు రానున్నారు. ఈ విషయాన్ని క్రెమ్లిన్ ప్రతినిధి యూరీ ఉషకోవ్ అధికారికంగా వెల్లడించారు. ఢిల్లీ వేదికగా సెప్టెంబరు 12, 13 తేదీల్లో జరగనున్న ప్రతిష్టాత్మక బ్రిక్స్ శిఖరాగ్ర సదస్సులో పుతిన్ స్వయంగా పాల్గొంటారని ఆయన స్పష్టం చేశారు. ప్రస్తుత అంతర్జాతీయ సమీకరణాల నేపథ్యంలో ఏడాది వ్యవధిలోనే పుతిన్ రెండోసారి భారత్లో పర్యటించనుండటం విశేషం. భారత్-రష్యా వార్షిక శిఖరాగ్ర సదస్సులో భాగంగా గతేడాది డిసెంబరులో ఆయన మనదేశానికి విచ్చేశారు. ఆ సమయంలో ప్రధానమంత్రి నరేంద్ర మోదీతో కలిసి రెండు దేశాల వ్యూహాత్మక, ఆర్థిక, రక్షణ సంబంధాల బలోపేతంపై సుదీర్ఘంగా చర్చలు జరిపారు. ప్రస్తుతం బ్రిక్స్ కూటమికి భారత్ ఛైర్మన్గా వ్యవహరిస్తోంది. ఇందులో భాగంగానే ఇటీవల జరిగిన బ్రిక్స్ విదేశాంగ మంత్రుల సమావేశానికి రష్యా విదేశాంగ మంత్రి సెర్గీ లావ్రోవ్ హాజరయ్యారు. ఆ పర్యటనలో ఆయన ప్రధాని మోదీతో భేటీ అయి.. పశ్చిమాసియా ఉద్రిక్తతలు, సుదీర్ఘంగా సాగుతున్న రష్యా-ఉక్రెయిన్ యుద్ధం సహా పలు కీలక అంతర్జాతీయ అంశాలపై చర్చలు జరిపారు. కాగా, ప్రస్తుతం పుతిన్ చైనా పర్యటనలో ఉన్నారు. ప్రారంభంలో బ్రెజిల్, రష్యా, ఇండియా, చైనాలతో కూడిన ‘బ్రిక్’ (BRIC) గా ఏర్పడిన ఈ కూటమి.. ఆ తర్వాత దక్షిణాఫ్రికా చేరికతో ‘బ్రిక్స్’ గా మారింది. ఇటీవల ఈ కూటమి మరింత విస్తరించింది. ఇరాన్, ఇథియోపియా, ఈజిప్ట్, యునైటెడ్ అరబ్ ఎమిరేట్స్ (UAE), ఇండోనేసియాలు కూడా ఇందులో చేరడంతో ప్రస్తుతం ఈ పది దేశాల విస్తృత కూటమిని ‘బ్రిక్స్ ప్లస్’ గా వ్యవహరిస్తున్నారు. సౌదీ అరేబియా, అర్జెంటీనాలు ఇంకా లాంఛనంగా ఇందులో చేరాల్సి ఉంది. గతేడాది ఈ బ్రిక్స్ సదస్సు బ్రెజిల్లోని రియో డి జనీరో నగరంలో విజయవంతంగా నిర్వహించబడింది.
