టీసీఎస్ వేతన పెంపు.. ఉద్యోగుల్లో అసంతృప్తి!

దేశీయ ఐటీ దిగ్గజం టాటా కన్సల్టెన్సీ సర్వీసెస్ (TCS) వార్షిక వేతన పెంపును అమలు చేసినప్పటికీ, అది ఉద్యోగుల్లో ఆనందానికి బదులు తీవ్ర అసంతృప్తిని, ఆందోళనను కలిగిస్తోంది. కంపెనీ సగటున 5 శాతం జీతాలు పెంచినట్లు ప్రకటించినా, అంతర్గత నిబంధనల్లో మార్పులు, కఠినమైన పనితీరు కోటాల వల్ల చేతికి వచ్చే నికర ఆదాయం తగ్గిపోయిందని ఉద్యోగులు ఆరోపిస్తున్నారు. ముఖ్యంగా ఈ ఏడాది ప్రతిభ కనబరిచిన ‘A+’ పర్ఫార్మెన్స్ బ్యాండ్ ఉద్యోగులకు అత్యధికంగా 9శాతం నుండి 13శాతం వరకు ఇంక్రిమెంట్లు లభించాయి. అయినప్పటికీ, అంతర్గత వేతన నిర్మాణంలో చేసిన మార్పులు, పనితీరు ఆధారంగా ఇచ్చే వేరియబుల్ పే తగ్గడం వల్ల మెజారిటీ ఉద్యోగుల ఇన్-హ్యాండ్ శాలరీ తగ్గిపోయింది. కంపెనీ ఆఫర్ చేసే కాస్ట్ టు కంపెనీ (CTC) నుండి గ్రాట్యుటీ మొత్తాన్ని తొలగించి చూపిస్తున్నారు. ప్రతి టీమ్‌లో కనీసం 5 శాతం మంది సిబ్బందిని అత్యంత తక్కువ పనితీరు కేటగిరీ అయిన ‘బ్యాండ్ డి’ లో ఉంచాలని యాజమాన్యం అంతర్గత కోటాను విధించినట్లు సమాచారం. సాధారణంగా ఈ బ్యాండ్‌లోని ఉద్యోగులపై కంపెనీ వేటు వేసే (లే-ఆఫ్) అవకాశం ఉండటంతో, భవిష్యత్తులో తమ ఉద్యోగాలు ఊడిపోతాయేమోననే అభద్రతా భావం ఉద్యోగుల్లో తీవ్రస్థాయికి చేరింది. ఈ వివాదం కేవలం టీసీఎస్‌కు మాత్రమే పరిమితమైనది కాదు. ప్రపంచవ్యాప్తంగా నెలకొన్న ఆర్థిక మందగమనం కారణంగా అంతర్జాతీయ క్లయింట్లు తమ ఐటీ బడ్జెట్లను తగ్గించుకున్నారు. కొత్త ప్రాజెక్టులను వాయిదా వేస్తున్నారు. ఈ నేపథ్యంలో ఆదాయ వృద్ధి మందగించడంతో, ఐటీ కంపెనీలు తమ నిర్వహణ వ్యయాన్ని తగ్గించుకోవడానికి ఉద్యోగుల వేతనాల్లో కోతలు, కఠినమైన పనితీరు నిబంధనలను తెరపైకి తెస్తున్నాయి.