గోదావరి పుష్కరాలకు భారీ ఏర్పాట్లు

-వెయ్యి కోట్లతో కుంభమేళా తరహాలో నిర్వహణ

వచ్చే ఏడాది జరగనున్న గోదావరి నది పుష్కరాలను అత్యంత ప్రతిష్ఠాత్మకంగా, కుంభమేళా తరహాలో నిర్వహించేందుకు తెలంగాణ ప్రభుత్వం భారీ ప్రణాళికను సిద్ధం చేసింది. రాష్ట్రంలోని ఎనిమిది జిల్లాల మీదుగా సుమారు 560 కిలోమీటర్ల మేర ప్రవహించే గోదావరి తీరంలో భక్తులకు ఎలాంటి అసౌకర్యం కలగకుండా ఏర్పాట్లు చేయాలని ముఖ్యమంత్రి రేవంత్ రెడ్డి నిర్ణయించారు. తొలుత బడ్జెట్‌లో రూ. 500 కోట్లు కేటాయించినప్పటికీ, క్షేత్రస్థాయి అవసరాలను దృష్టిలో ఉంచుకుని పనుల వ్యయాన్ని రూ. 1,000 కోట్లకు పెంచుతూ ముఖ్యమంత్రి మౌఖికంగా పచ్చజెండా ఊపారు. దీంతో పుష్కరాల నిర్వహణకు సంబంధించిన ఫైలు దేవాదాయ శాఖ మంత్రి కొండా సురేఖ కార్యాలయానికి చేరింది.

2027 జూలైలో జరగనున్న ఈ మహా క్రతువుకు దేవాదాయ శాఖను నోడల్ ఏజెన్సీగా ప్రభుత్వం నియమించింది. పుష్కర ఘాట్ల నిర్మాణం, భక్తుల కోసం రహదారుల విస్తరణ, తీర ప్రాంతాల్లోని ఆలయాల పునరుద్ధరణ వంటి పనుల కోసం వివిధ శాఖల నుంచి సుమారు రూ. 6,000 కోట్ల ప్రతిపాదనలు వచ్చాయి. అయితే, ఆర్థిక పరిస్థితిని బేరీజు వేసుకున్న ప్రభుత్వం, ప్రాధాన్యత క్రమంలో అత్యంత అవసరమైన రూ. 1,000 కోట్ల పనులకు ప్రస్తుతం ఆమోదం తెలిపింది. బడ్జెట్ నిధులతో పాటు మిగిలిన మొత్తాన్ని ఆయా శాఖల కేటాయింపుల నుంచి సర్దుబాటు చేయనున్నారు. కేంద్ర ప్రభుత్వం నుంచి కూడా ఈ పుష్కరాల కోసం భారీగా నిధులు కోరాలని రాష్ట్ర ప్రభుత్వం భావిస్తోంది.

పుష్కరాల పనులను పర్యవేక్షించేందుకు దేవాదాయ శాఖ కమిషనర్‌ను ప్రత్యేక అధికారిగా ప్రభుత్వం నియమించింది. మంత్రివర్గ ఉపసంఘం చైర్మన్ శ్రీధర్ బాబు, ఇతర మంత్రుల ఆమోదం తర్వాత నిధుల విడుదల ప్రక్రియ వేగవంతం కానుంది. కోట్లాది మంది భక్తులు తరలివచ్చే అవకాశం ఉన్నందున, శాశ్వత ప్రాతిపదికన మౌలిక సదుపాయాల కల్పనపై ప్రభుత్వం దృష్టి సారించింది. భక్తుల రద్దీని నియంత్రించడం, పారిశుధ్యం, తాగునీటి సరఫరా వంటి అంశాల్లో రాజీ పడకుండా ఏర్పాట్లు చేయాలని అధికారులను ప్రభుత్వం ఆదేశించింది. ఈ పుష్కరాలు తెలంగాణ ఆధ్యాత్మిక వైభవాన్ని చాటిచెప్పేలా ఉండాలని ప్రభుత్వం సంకల్పించింది.