శివాలయంలో దీపంతో సిగరెట్ వెలిగించిన యువకుడు..
కర్నూలు జిల్లా ఆదోని పరిధిలోని వీరుపాపురం గ్రామంలో ఓ యువకుడు శివాలయంలో భక్తులు వెలిగించిన పవిత్ర దీపంతో సిగరెట్ వెలిగించిన ఘటన తీవ్ర వివాదానికి దారితీసింది. వడ్డే ఈరన్నగా గుర్తించిన యువకుడు ఆలయంలో ఈ చర్యకు పాల్పడగా, అతని స్నేహితులు దానిని వీడియో తీసి సోషల్ మీడియాలో పోస్టు చేశారు. ప్రస్తుతం ఆ వీడియో వైరల్ కావడంతో హిందూ భక్తులు తీవ్ర ఆగ్రహం వ్యక్తం చేస్తున్నారు.
పవిత్ర ఆలయ ప్రాంగణంలో జరిగిన ఈ ఘటన హిందూ మత విశ్వాసాలను దెబ్బతీసేలా ఉందని పలువురు అభిప్రాయపడుతున్నారు. యువకుడి చర్యను అడ్డుకోవాల్సిన స్నేహితులు వీడియో చిత్రీకరించి సోషల్ మీడియాలో ప్రచారం చేయడంపై కూడా విమర్శలు వ్యక్తమవుతున్నాయి.
ఈ ఘటనపై నిందితులతో పాటు వీడియో చిత్రీకరించి ప్రచారం చేసిన వారిపైనా కఠిన చర్యలు తీసుకోవాలని భక్తులు, నెటిజన్లు డిమాండ్ చేస్తున్నారు. ఆంధ్రప్రదేశ్ హోంమంత్రి వంగలపూడి అనిత అధికారిక ఎక్స్ ఖాతాను ట్యాగ్ చేస్తూ, బాధ్యులపై వెంటనే కేసు నమోదు చేసి అరెస్టు చేయాలని కోరుతున్నారు.
ప్రస్తుతం ఈ ఘటనకు సంబంధించిన వీడియో సోషల్ మీడియాలో విస్తృతంగా చర్చనీయాంశంగా మారింది. అయితే ఈ వ్యవహారంపై పోలీసులు అధికారికంగా స్పందించారా లేదా, కేసు నమోదు చేశారా అనే విషయంపై స్పష్టత రావాల్సి ఉంది.
