ఇండోనేషియా నుంచి మోదీకి అత్యున్నత గౌరవం

భారత ప్రధాని నరేంద్ర మోదీకి ఇండోనేషియా అత్యున్నత పౌర పురస్కారం ‘బింతాంగ్ ఆదిపూర్ణ’ లభించింది. జకార్తాలో మంగళవారం జరిగిన కార్యక్రమంలో ఇండోనేషియా అధ్యక్షుడు ప్రబోవో సుబియాంటో ఈ అవార్డును ప్రధాని మోదీకి అందజేశారు.

భారత్- ఇండోనేషియా ద్వైపాక్షిక సంబంధాలను బలోపేతం చేయడంలో మోదీ చేసిన విశేష కృషికి గుర్తింపుగా ఈ గౌరవాన్ని ప్రదానం చేసినట్లు ఇండోనేషియా ప్రభుత్వం వెల్లడించింది.

పురస్కారం అందుకున్న అనంతరం ప్రధాని మోదీ ఎక్స్ వేదికగా స్పందించారు. ఈ గౌరవం తనకు మాత్రమే కాకుండా కోట్లాది మంది భారతీయులకు దక్కిన గుర్తింపని పేర్కొన్నారు. భారత్- ఇండోనేషియా మధ్య ఉన్న చారిత్రాత్మక స్నేహబంధానికి ఈ పురస్కారం ప్రతీకగా నిలుస్తుందని అన్నారు. ఈ సందర్భంగా అధ్యక్షుడు ప్రబోవో సుబియాంటోతో పాటు ఇండోనేషియా ప్రభుత్వం, అక్కడి ప్రజలకు కృతజ్ఞతలు తెలిపారు.

విదేశాంగ మంత్రిత్వ శాఖ ప్రతినిధి రణధీర్ జైస్వాల్ ఈ అవార్డును భారత్- ఇండోనేషియా స్నేహానికి నిదర్శనంగా అభివర్ణించారు. అలాగే విదేశాంగ మంత్రి ఎస్. జైశంకర్ కూడా ప్రధాని మోదీకి అభినందనలు తెలిపారు. 1959లో ప్రారంభమైన ‘బింతాంగ్ ఆదిపూర్ణ’ ఇండోనేషియాలో అత్యంత ప్రతిష్టాత్మక పురస్కారంగా గుర్తింపు పొందింది. దేశాభివృద్ధి, అంతర్జాతీయ సంబంధాల బలోపేతానికి విశేష సేవలు అందించిన ప్రముఖులకు ఈ గౌరవాన్ని ప్రదానం చేస్తారు.