తెలంగాణ పదో తరగతి పరీక్ష ఫలితాలు ఎప్పుడంటే..!?

తెలంగాణలో ఇంటర్ ప్రథమ సంవత్సరం, ద్వితీయ సంవత్సరం ఫలితాలు ఇవాళ విడుదల కాగా, టెన్త్ ఫలితాల విడుదల తేదీని విద్యాశాఖ ప్రకటించింది. తెలంగాణ 10వ తరగతి పరీక్ష ఫలితాలు ఈ నెల 30న విడుదల కానున్నాయి. 30వ తేదీ ఉదయం 11 గంటలకు విద్యాశాఖ కార్యదర్శి బుర్రా వెంకటేశం ఫలితాలను విడుదల చేయనున్నారు. కాగా, తెలంగాణలో మార్చి 18 నుంచి ఏప్రిల్ 2 వరకు పరీక్షలు నిర్వహించగా.. 10వ తరగతి పరీక్షలకు మొత్తం 2,676 కేంద్రాలను ఏర్పాటు చేశారు. పరీక్షలు ముగిసిన వెంటనే మరుసటి రోజు నుండి అంటే ఏప్రిల్ 3వ తేదీ నుండి స్పాట్ వాల్యుయేషన్ ప్రారంభమైంది. స్పాట్ వాల్యుయేషన్ ప్రక్రియ ఏప్రిల్ 3 నుండి ఏప్రిల్ 13 వరకు కొనసాగింది. రాష్ట్రవ్యాప్తంగా మొత్తం 19 కేంద్రాల్లో స్పాట్ వాల్యుయేషన్ నిర్వహించారు. ఈసారి ఫలితాల వెల్లడికి 27 రోజులు పట్టింది. 10వ తరగతి ఫలితాలను ఏప్రిల్ 30న విడుదల చేసేందుకు ఇంటర్ బోర్డు సన్నాహాలు చేస్తోంది.