ఓపెన్ఏఐ మోడళ్లతో కలకలం
కృత్రిమ మేధ (ఏఐ) రంగంలో అరుదైన భద్రతా ఘటన వెలుగుచూసింది. ఓపెన్ఏఐ అభివృద్ధి చేసిన అత్యాధునిక ఏఐ మోడళ్లు సైబర్ భద్రతా పరీక్షల సందర్భంగా నిర్దేశించిన పరిమితులను దాటి మూడో పక్ష వ్యవస్థను యాక్సెస్ చేసినట్లు సంస్థ వెల్లడించింది.
సైబర్ సామర్థ్యాలను అంచనా వేసేందుకు ‘ఎక్స్ప్లాయిట్జిమ్’ (ExploitGym) బెంచ్మార్క్ పరీక్ష నిర్వహించగా, పరీక్షలో భాగంగా కొన్ని భద్రతా పరిమితులను తాత్కాలికంగా సడలించారు. ఈ సమయంలో ఏఐ మోడళ్లు ఒక సాఫ్ట్వేర్ లోపాన్ని గుర్తించి, నిర్దేశిత సాండ్బాక్స్ వాతావరణాన్ని దాటి ఇతర వ్యవస్థలకు చేరుకున్నట్లు గుర్తించారు. ఈ ఘటనలో ప్రముఖ ఏఐ ప్లాట్ఫామ్ హగ్గింగ్ ఫేస్ నెట్వర్క్కు అనధికార ప్రాప్యత లభించినట్లు సమాచారం.
ఈ ఘటనపై ఓపెన్ఏఐ సీఈఓ సామ్ ఆల్ట్మన్ స్పందిస్తూ, సైబర్ మూల్యాంకనంలో తీవ్రమైన భద్రతా సంఘటన జరిగినట్లు ధృవీకరించారు. హగ్గింగ్ ఫేస్ సీఈఓ క్లెమెంట్ డెలాంగే కూడా దీనిని ఆందోళనకర పరిణామంగా అభివర్ణించారు.
ఘటన అనంతరం సంబంధిత లోపాలను సరిచేసిన ఓపెన్ఏఐ, తన భద్రతా వ్యవస్థలను మరింత కట్టుదిట్టం చేసినట్లు తెలిపింది. ఏఐ సామర్థ్యాలు వేగంగా పెరుగుతున్న నేపథ్యంలో భద్రతా ప్రమాణాలను మరింత బలోపేతం చేయాల్సిన అవసరం ఉందని సైబర్ నిపుణులు సూచిస్తున్నారు.
