అగ్ని క్షిపణి ప్రయోగం సక్సెస్

-ప్రపంచ దేశాల సరసన భారత్

భారత రక్షణ వ్యవస్థ అమ్ముల పొదిలోకి మరో అజేయమైన అస్త్రం వచ్చి చేరింది. ఒకే దెబ్బకు బహుళ లక్ష్యాలను ఛేదించగల అసాధారణ సామర్థ్యం గల ‘అగ్ని’ క్షిపణిని భారత్ శనివారం విజయవంతంగా పరీక్షించి, ప్రపంచ అగ్రరాజ్యాల సరసన నిలిచింది. ఒడిశా తీరంలోని డాక్టర్ ఏపీజే అబ్దుల్ కలాం ద్వీపం వేదికగా ఈ చారిత్రక ప్రయోగం జరిగింది. స్వదేశీ పరిజ్ఞానంతో రూపొందించిన ఈ సుదీర్ఘ శ్రేణి క్షిపణి, హిందూ మహాసముద్రంలోని వివిధ ప్రాంతాల్లో ఉన్న లక్ష్యాలను అత్యంత ఖచ్చితత్వంతో తాకింది. ఈ అద్భుత ఘట్టాన్ని భూమిపైన, నౌకల్లోని ట్రాకింగ్ స్టేషన్ల ద్వారా శాస్త్రవేత్తలు నిశితంగా పరిశీలించారు.
ఈ క్షిపణికి ఉన్న ప్రధాన బలం సాంకేతికత. సాధారణ క్షిపణులు ఒక్క వార్‌హెడ్‌తో ఒకే లక్ష్యాన్ని తాకితే, ఈ సాంకేతికత కలిగిన అగ్ని క్షిపణి మాత్రం ఒకేసారి పలు వార్‌హెడ్‌లను మోసుకెళ్లగలదు. ఇవి అంతరిక్షం నుండి తిరిగి వాతావరణంలోకి వచ్చే సమయంలో విడిపోయి, వేర్వేరు దిశల్లో ఉన్న శత్రు స్థావరాలను ఒకే ముహూర్తాన నాశనం చేస్తాయి.

ప్రపంచ దేశాల సరసన భారత్
ప్రస్తుతం ఈ తరహా అధునాతన సాంకేతికత ప్రపంచంలోని అతికొద్ది దేశాల వద్ద మాత్రమే ఉంది. డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్ శాస్త్రవేత్తలు తీవ్రంగా కృషి చేసి ఈ అద్భుతాన్ని ఆవిష్కరించారు. ఈ విజయంతో రక్షణ రంగంలో భారత్ తన స్వయం సమృద్ధిని చాటుకోవడమే కాకుండా, అంతర్జాతీయ స్థాయిలో తన వ్యూహాత్మక బలాన్ని పెంచుకుంది. ఈ అద్భుత విజయంపై రక్షణ మంత్రి రాజ్‌నాథ్ సింగ్ హర్షం వ్యక్తం చేశారు. డీఆర్‌డీఓ శాస్త్రవేత్తలను అభినందించారు. మారుతున్న ప్రాంతీయ భద్రతా పరిస్థితుల దృష్ట్యా, ఈ క్షిపణి భారత్ అణ్వాయుధ నిరోధక శక్తిని పతాక స్థాయికి తీసుకెళ్తుందని ఆయన పేర్కొన్నారు. ఇది కేవలం ప్రయోగం మాత్రమే కాదు, దేశ రక్షణ కవచానికి పటిష్టమైన భరోసా అని రక్షణ శాఖ వెల్లడించింది.