యంగ్ ఇండియా స్టూడెంట్ కిట్లను పంపిణీ చేసిన సీఎం

తెలంగాణలోని ప్రభుత్వ విద్యా సంస్థల్లో చదువుతున్న పేద విద్యార్థులకు నాణ్యమైన విద్యతో పాటు అన్ని వసతులను కల్పించడమే లక్ష్యంగా రాష్ట్ర ప్రభుత్వం సరికొత్త అడుగు వేసింది. ఇందులో భాగంగా ప్రభుత్వం అత్యంత ప్రతిష్టాత్మకంగా ప్రవేశపెట్టిన ‘యంగ్ ఇండియా స్టూడెంట్ కిట్’ పంపిణీ కార్యక్రమం నేడు అట్టహాసంగా ప్రారంభం అయింది. హైదరాబాద్‌లోని ఎల్బీ స్టేడియంలో నిర్వహించిన భారీ బహిరంగ వేదికపై గౌరవ గవర్నర్ శివప్రతాప్ శుక్లాతో కలిసి ముఖ్యమంత్రి రేవంత్ రెడ్డి స్వయంగా విద్యార్థులకు ఈ కిట్లను అందజేశారు. ఈ వినూత్న విద్యా కార్యక్రమ ప్రారంభోత్సవానికి సర్కారు విద్యా సంస్థల నుంచి దాదాపు 15,000 మంది విద్యార్థులు హాజరయ్యారు.

రాష్ట్రవ్యాప్తంగా ఉన్న ప్రభుత్వ పాఠశాలలు, కస్తూర్బా గాంధీ బాలికా విద్యాలయాలు (కేజీబీవీ), సంక్షేమ వసతి గృహాలతో పాటు వివిధ సామాజిక వర్గాల గురుకుల పాఠశాలల విద్యార్థులందరికీ ఈ పథకం వర్తించనుంది. విద్యార్థులు చదువుకునే విద్యా సంస్థల రకాన్ని బట్టి, వారి అవసరాలకు అనుగుణంగా ప్రభుత్వం ఈ కిట్లలోని వస్తువులను ప్రత్యేకంగా రూపొందించింది. ఇందులో భాగంగా గురుకులాల్లో ఉండి చదువుకునే విద్యార్థులకు నిత్యావసరాలు, విద్యా సామగ్రితో కూడిన అత్యధికంగా 22 రకాల వస్తువులను ఈ కిట్లో చేర్చారు. అలాగే ప్రభుత్వ హాస్టళ్లలో ఉండే విద్యార్థుల రోజువారీ అవసరాలకు సరిపోయేలా 10 రకాల వస్తువులతో కూడిన కిట్లను సిద్ధం చేశారు. ఇక రోజూ బడికి వచ్చి వెళ్లే సాధారణ విద్యార్థుల కోసం పుస్తకాలు, స్టేషనరీతో కూడిన 7 రకాల ముఖ్యమైన వస్తువులను ఈ కిట్ ద్వారా పంపిణీ చేయనున్నారు.

పేద విద్యార్థులకు చదువు భారం కాకూడదనే ఉద్దేశంతో, కార్పొరేట్ పాఠశాలలకు ఏమాత్రం తీసిపోని విధంగా నాణ్యమైన వస్తువులతో ఈ ‘యంగ్ ఇండియా స్టూడెంట్ కిట్’లను తెలంగాణ ప్రభుత్వం సిద్ధం చేసింది. ప్రభుత్వ పాఠశాలల్లో మౌలిక వసతులను మెరుగుపరచడంతో పాటు విద్యార్థులకు అవసరమైన అన్ని వస్తువులను ఉచితంగా అందించి వారి భవిష్యత్తుకు భరోసా ఇవ్వడమే ఈ పథకం యొక్క ముఖ్య ఉద్దేశం. నేటి అధికారిక ప్రారంభోత్సవం అనంతరం రాష్ట్రవ్యాప్తంగా ఉన్న అన్ని జిల్లాల్లోని ప్రభుత్వ విద్యార్థులకు ఈ కిట్లను విడతల వారీగా పంపిణీ చేయడానికి విద్యాశాఖ అన్ని ఏర్పాట్లు పూర్తి చేసింది.