మోదీతో వెంకయ్యనాయుడు భేటీ
మాజీ ఉపరాష్ట్రపతి ముప్పవరపు వెంకయ్యనాయుడు దేశ రాజధాని దిల్లీలో ప్రధానమంత్రి నరేంద్రమోదీతో ప్రత్యేకంగా సమావేశమయ్యారు. దిల్లీలోని సేవా తీర్థ్ వేదికగా జరిగిన ఈ భేటీ ప్రాధాన్యతను సంతరించుకుంది. అటల్ స్మృతి న్యాస్ సొసైటీ ఛైర్మన్గా వెంకయ్యనాయుడు బాధ్యతలు స్వీకరించిన తర్వాత ప్రధానమంత్రితో జరిపిన కీలక సమాలోచనగా దీనిని పేర్కొనవచ్చు. భారత మాజీ ప్రధానమంత్రి, స్వర్గీయ అటల్ బిహారీ వాజ్పేయీ స్మారకార్థం దిల్లీలో నిర్మించిన ‘సదైవ్ అటల్’ నిర్మాణ పనుల నుంచి, ప్రస్తుతం దాని నిర్వహణ బాధ్యతల వరకు అన్నింటినీ ఈ సొసైటీయే దగ్గరుండి చూసుకుంటోంది. ఈ నేపథ్యంలోనే వీరిద్దరి మధ్య ముఖ్యమైన అంశాలపై సుదీర్ఘ చర్చ సాగింది.
గత ఏడాది డిసెంబర్ నుంచి అటల్ స్మృతి న్యాస్ సొసైటీకి ఛైర్మన్గా వ్యవహరిస్తున్న వెంకయ్యనాయుడు, వాజ్పేయీ ఆశయాల సాధన కోసం ఈ సమావేశంలో కొన్ని ప్రతిపాదనలను ప్రధాని ముందుంచారు. అటల్ బిహారీ వాజ్పేయీ దేశానికి అందించిన సేవలు, ఆయన ఆలోచనలు, సిద్ధాంతాలు, నైతిక విలువలను భవిష్యత్ తరాలకు విస్తృతంగా చేరవేయడమే లక్ష్యంగా ఈ చర్చలు జరిగాయి. ఇందుకోసం సొసైటీ తరఫున రాబోయే రోజుల్లో రూపొందించుకోవాల్సిన ప్రత్యేక విధివిధానాలు, ప్రణాళికలు, చేపట్టబోయే వైవిధ్యభరితమైన కార్యక్రమాలపై ప్రధానమంత్రి నరేంద్రమోదీతో వెంకయ్యనాయుడు కూలంకషంగా మాట్లాడారు.
దేశ ప్రగతికి వాజ్పేయీ వేసిన బలమైన పునాదులను, ఆయన రాజకీయ జీవితంలోని ఉన్నతమైన విలువలను యువత ఆదర్శంగా తీసుకునేలా స్ఫూర్తిదాయక కార్యక్రమాలను రూపొందించాలని ఇరు నేతలు భావించారు. ఈ మహత్తర ఆశయ సాధనలో అటల్ స్మృతి న్యాస్ సొసైటీ పాత్రను మరింత బలోపేతం చేసేందుకు, భవిష్యత్తు కార్యాచరణను ఎలా ముందుకు తీసుకెళ్లాలనే అంశంపై ప్రధాని మోదీ కీలకమైన సూచనలు చేశారు. వాజ్పేయీ స్మృతులను సజీవంగా ఉంచేందుకు సొసైటీ చేస్తున్న కృషిని, వారి ఆలోచనలను ఈ సందర్భంగా ప్రధానికి వెంకయ్యనాయుడు వివరించారు. ఈ భేటీ అత్యంత సానుకూల వాతావరణంలో ముగిసింది.