రిజర్వేషన్పై సోషల్ మీడియా ఉద్యమం
న్యూఢిల్లీ: దేశంలో రిజర్వేషన్ విధానంపై చర్చకు దారితీసేలా సోషల్ మీడియాలో ‘రిజర్వేషన్ హటావో మూవ్మెంట్’ (RHA) పేరుతో కొత్త డిజిటల్ ప్రచారం ప్రారంభమైంది. ప్రస్తుతం అమల్లో ఉన్న రిజర్వేషన్ వ్యవస్థలో మార్పులు తీసుకురావాలని, విద్య, ఉద్యోగ అవకాశాల్లో ప్రతిభకు ప్రాధాన్యం కల్పించాలని ఈ ఉద్యమానికి మద్దతుదారులు డిమాండ్ చేస్తున్నారు. ఈ ప్రచారానికి ఏ రాజకీయ పార్టీతోనూ సంబంధం లేదని నిర్వాహకులు చెబుతున్నారు. ప్రభుత్వ ఉద్యోగాలు, విద్యాసంస్థల ప్రవేశాలు తదితర ప్రక్రియల్లో కుల వివరాలను అడగాల్సిన అవసరం లేకుండా విధానాల్లో మార్పులు తీసుకురావాలని వారు కోరుతున్నారు. సమాజంలో కుల వివక్షను తగ్గించాలంటే అధికారిక వ్యవస్థల్లో కుల గుర్తింపుపై ఆధారపడే విధానాలను పునఃసమీక్షించాలని అభిప్రాయపడుతున్నారు.
ఈ ఉద్యమానికి సంబంధించిన ఇన్స్టాగ్రామ్ ఖాతా ప్రారంభమైన కొద్ది సమయంలోనే లక్షలాది మంది ఫాలో అవుతున్నారనే ప్రచారం సోషల్ మీడియాలో చర్చనీయాంశమైంది. దీంతో ఈ డిజిటల్ ప్రచారానికి రోజురోజుకూ మద్దతు పెరుగుతోందని పోస్టులు వైరల్ అవుతున్నాయి. అయితే, ఈ ఉద్యమానికి సంబంధించిన వివరాలు, సభ్యత్వ సంఖ్యలు, ప్రభావం వంటి అంశాలపై స్వతంత్ర అధికారిక ధ్రువీకరణ అందుబాటులో లేదు. ఇదిలా ఉండగా, దేశంలో రిజర్వేషన్ విధానంపై రాజకీయ పార్టీల మధ్య భిన్నాభిప్రాయాలు కొనసాగుతున్న నేపథ్యంలో ఈ సోషల్ మీడియా ప్రచారం రాబోయే రోజుల్లో ఎలాంటి చర్చకు దారితీస్తుందన్నది ఆసక్తికరంగా మారింది.
