తక్కువ వడ్డీ.. దాగిన ఖర్చులు
అత్యవసర అవసరాలు, సొంత ఇల్లు కొనుగోలు లేదా వ్యాపార విస్తరణ కోసం రుణాలు తీసుకోవడం ఇప్పుడు సాధారణమైంది. అయితే తక్కువ వడ్డీ రేట్లతో ఆకర్షించే బ్యాంకులు, ఆర్థిక సంస్థలు రుణాలతో పాటు పలు అదనపు ఛార్జీలను కూడా వసూలు చేస్తుంటాయి. వీటి గురించి ముందుగానే తెలుసుకోకపోతే రుణగ్రహీతలు ఊహించని ఆర్థిక భారాన్ని ఎదుర్కోవాల్సి వస్తుంది. రుణం మంజూరు చేసే సమయంలో ప్రాసెసింగ్ ఫీజు, డాక్యుమెంట్ వెరిఫికేషన్, లీగల్ ఛార్జీలు, ప్రాపర్టీ వాల్యుయేషన్ ఫీజు, నిర్వహణ రుసుము వంటి ఖర్చులు విధిస్తారు. కొన్ని సంస్థలు ప్రాసెసింగ్ ఫీజు మాఫీ అని ప్రకటించినా, ఇతర పేర్లతో అదే మొత్తాన్ని వసూలు చేసే అవకాశం ఉంటుంది. వీటికి అదనంగా జీఎస్టీ కూడా చెల్లించాల్సి ఉంటుంది.
రుణం తీసుకున్న తర్వాత ఈఎంఐ చెల్లింపులో ఆలస్యం జరిగితే లేట్ పేమెంట్ ఫీజులు, చెక్ లేదా నాచ్ బౌన్స్ ఛార్జీలు, అదనపు వడ్డీ వంటి భారాలు పెరుగుతాయి. అలాగే రుణాన్ని ముందుగానే పూర్తిగా చెల్లించాలనుకుంటే ప్రీపేమెంట్ లేదా ఫోర్క్లోజర్ పెనాల్టీలు కూడా విధించవచ్చు. ఫ్లోటింగ్ వడ్డీ రేటు ఉన్న రుణాల్లో వడ్డీ మార్పులతో ఈఎంఐలు కూడా పెరిగే అవకాశం ఉంటుంది.
అందువల్ల రుణం తీసుకునే ముందు కేవలం వడ్డీ రేటును మాత్రమే కాకుండా యాన్యువల్ పర్సంటేజ్ రేట్ (APR), అన్ని రకాల ఛార్జీలు, జరిమానాలు, నిబంధనలను పూర్తిగా పరిశీలించడం అవసరం. రుణ ఒప్పందంపై సంతకం చేసే ముందు సందేహాలన్నింటినీ బ్యాంకుతో స్పష్టంగా తెలుసుకోవడం ద్వారా భవిష్యత్తులో అనవసర ఆర్థిక భారాన్ని నివారించవచ్చు.
