బీఆర్ఎస్ వస్తే ‘భారత్ ఫ్యూచర్ సిటీ’ రద్దు
మళ్లీ ‘ఫార్మా సిటీ’ వైపే
హరీశ్రావు సంచలన వ్యాఖ్యలు
తెలంగాణలో అధికార కాంగ్రెస్ ప్రభుత్వం ఎంతో ప్రతిష్ఠాత్మకంగా ప్రమోట్ చేస్తున్న ‘ఫ్యూచర్ సిటీ’ ప్రాజెక్టుపై బీఆర్ఎస్ కీలక నేత, మాజీ మంత్రి హరీశ్రావు తీవ్రస్థాయిలో మండిపడ్డారు. ప్రస్తుతం అమెరికా పర్యటనలో ఉన్న ఆయన అక్కడ జరిగిన ఒక కార్యక్రమంలో మాట్లాడుతూ, తాము మళ్లీ అధికారంలోకి వచ్చిన వెంటనే ఈ ఫ్యూచర్ సిటీ ప్రాజెక్ట్ను పూర్తిగా రద్దు చేస్తామని సంచలన ప్రకటన చేశారు. గత బీఆర్ఎస్ ప్రభుత్వం ఎంతో ప్రతిష్ఠాత్మకంగా డిజైన్ చేసిన ‘ఫార్మా సిటీ’ని మళ్లీ పునరుద్ధరిస్తామని ఈ సందర్భంగా ఆయన స్పష్టం చేశారు.
ఫార్మా సిటీ నిర్మాణం కోసం తాము గతంలో సుమారు 16 వేల ఎకరాల భూసేకరణ చేశామని, దానికి కేంద్ర పర్యావరణ శాఖ నుంచి అన్ని రకాల అనుమతులు, క్లియరెన్సులు కూడా వచ్చాయని హరీశ్రావు గుర్తుచేశారు. రైతుల నుంచి ఏ ఉద్దేశంతోనైతే భూములు సేకరించామో, దానికి భిన్నంగా వేరే అవసరాల కోసం ల్యాండ్ను వాడుకుంటే, చట్ట ప్రకారం ఆ భూములను తిరిగి రైతులకే అప్పగించాల్సి ఉంటుందని ఆయన పేర్కొన్నారు. కాంగ్రెస్ ప్రభుత్వం ఫ్యూచర్ సిటీ పేరుతో కేవలం రియల్ ఎస్టేట్ వ్యాపారానికి తెరలేపిందని ఆయన విమర్శించారు.
ఫార్మా సిటీని రద్దు చేయడం లేదంటూ రేవంత్ రెడ్డి సర్కార్ హైకోర్టులో అబద్ధాలు చెప్పిందని హరీశ్రావు ఆరోపించారు. కోర్టు విచారణ సందర్భంగా ఫార్మా సిటీని కొనసాగిస్తామని చెబుతూనే, బయట మాత్రం ఫ్యూచర్ సిటీ అంటూ కాంగ్రెస్ సరికొత్త డ్రామాలు ఆడుతోందని మండిపడ్డారు. ఫార్మా సిటీ ద్వారా రాష్ట్రంలోని లక్షలాది మంది నిరుద్యోగ యువతకు ఉపాధి, ఉద్యోగావకాశాలు లభిస్తాయని, అందువల్ల చట్ట ప్రకారం దాన్నే కొనసాగించాల్సిన బాధ్యత ఉందన్నారు. హరీశ్రావు చేసిన ఈ వ్యాఖ్యలు ప్రస్తుతం తెలంగాణ రాజకీయ వర్గాల్లో పెద్ద దుమారాన్ని రేపుతున్నాయి.
