బలపరీక్షలో నెగ్గిన సీఎం విజయ్

చెన్నై (ఏడీఎన్ఎన్): తమిళనాడు రాజకీయాల్లో సరికొత్త శకం ప్రారంభమైంది. నూతన ముఖ్యమంత్రిగా బాధ్యతలు చేపట్టిన తమిళగ వెట్రి కళగం అధినేత విజయ్, బుధవారం శాసనసభలో తన బలాన్ని నిరూపించుకున్నారు. ప్రతిపక్షాల విమర్శలు, రాజకీయ ఉత్కంఠ మధ్య జరిగిన బలపరీక్షలో విజయ్ సర్కార్ స్పష్టమైన మెజార్టీ సాధించింది. పరిపాలనపై తన పట్టును చాటింది. బలపరీక్షకు సంబంధించి ముఖ్యమంత్రి విజయ్ స్వయంగా సభలో తీర్మానాన్ని ప్రవేశపెట్టారు. ఈ సందర్భంగా స్పీకర్ ఓటింగ్ ప్రక్రియను అత్యంత పారదర్శకంగా నిర్వహించారు. సాధారణ పద్ధతిలో కాకుండా, ఒక్కో సభ్యుడి పేరును పిలుస్తూ వారి సమ్మతిని రికార్డు చేశారు. ఈ ఓటింగ్‌లో విజయ్ ప్రభుత్వానికి అనుకూలంగా 144 మంది ఎమ్మెల్యేలు ఓటు వేయగా, కేవలం 22 మంది మాత్రమే వ్యతిరేకించారు. ఈ బలపరీక్షలో విజయ్ గెలుపునకు మిత్రపక్షాలైన కాంగ్రెస్, వీసీకే, ఐయూఎంఎల్ పార్టీలు అండగా నిలిచాయి. వీటితో పాటు అన్నాడీఎంకేలోని రెబల్ వర్గం ఎమ్మెల్యేలు కూడా ముఖ్యమంత్రికి అనుకూలంగా ఓటు వేయడం గమనార్హం. అయితే, ప్రధాన ప్రతిపక్షమైన డీఎంకే సభ్యులు ఓటింగ్‌లో పాల్గొనకుండా సభ నుంచి వాకౌట్ చేశారు. దీంతో విజయ్ విజయం మరింత సులభతరమైంది.