రాహుల్పై వాంగ్చుక్ భార్య ఫైర్
ప్రముఖ పర్యావరణవేత్త, సామాజిక కార్యకర్త సోనమ్ వాంగ్చుక్ భార్య గీతాంజలి అంగ్మో కాంగ్రెస్ పార్టీ, ఆ పార్టీ నేత రాహుల్ గాంధీపై విమర్శలు చేశారు. విద్యార్థుల ఉద్యమాన్ని రాజకీయ ప్రయోజనాల కోసం ఉపయోగించకూడదని ఆమె అభిప్రాయపడ్డారు. ఇటీవల విద్యార్థుల నిరసనలు హింసాత్మకంగా మారిన నేపథ్యంలో కాంగ్రెస్ అధ్యక్షుడు మల్లికార్జున ఖర్గే, రాహుల్ గాంధీ, ప్రియాంకా గాంధీ తదితరులు ఢిల్లీలోని ప్రధాని నివాసం వద్ద నిరసన చేపట్టారు. దీనిపై స్పందించిన గీతాంజలి అంగ్మో, ప్రధాని నివాసం వద్ద చేపట్టిన దీక్షలో నిజాయితీ కనిపించడం లేదని వ్యాఖ్యానించారు.
విద్యార్థుల సమస్యలపై నిజంగా చిత్తశుద్ధి ఉంటే జంతర్మంతర్ వద్ద కొనసాగుతున్న నిరసనల్లో పాల్గొని వారికి మద్దతు ఇవ్వాలని, వేర్వేరుగా రాజకీయ కార్యక్రమాలు నిర్వహించడం సరైన విధానం కాదని అన్నారు. సోనమ్ వాంగ్చుక్, విద్యార్థుల ఉద్యమాన్ని కొందరు రాజకీయ నాయకులు తమ స్వప్రయోజనాల కోసం ఉపయోగించేందుకు ప్రయత్నిస్తున్నారని ఆరోపించారు.
ప్రజలను ఎక్కువకాలం ఎవరూ తప్పుదోవ పట్టించలేరని, దేశ యువత నిజాయితీని గుర్తిస్తుందని గీతాంజలి పేర్కొన్నారు. సోనమ్ వాంగ్చుక్ ఉద్యమాన్ని రాజకీయ లబ్ధి కోసం వినియోగించే ప్రయత్నాలకు ప్రజల మద్దతు దక్కదని ఆమె వ్యాఖ్యానించారు. ఈ వ్యాఖ్యలు ప్రస్తుతం రాజకీయ వర్గాల్లో చర్చనీయాంశంగా మారాయి.
