ఎవరు అడ్డుపడినా.. ఫ్యూచర్ సిటీని నిర్మించి తీరుతాం

ఎవరు ఎన్ని అడ్డంకులు సృష్టించినా, ఏమనుకున్నా సరే మూసీ నది ప్రక్షాళనను అత్యంత ప్రతిష్టాత్మకంగా పూర్తి చేసి తీరుతామని తెలంగాణ ముఖ్యమంత్రి రేవంత్ రెడ్డి స్పష్టం చేశారు. హైదరాబాద్ నగర పరిధిలోని గండిపేట నుంచి గౌరెల్లి వరకు దాదాపు 55 కిలోమీటర్ల మేర ఈ నదీ ప్రక్షాళన పనులను పకడ్బందీగా చేపడతామని ఆయన ప్రకటించారు. దేశంలోనే ప్రముఖమైన సబర్మతి, గంగా రివర్‌ఫ్రంట్‌ల కంటే ఎంతో మెరుగ్గా, అంతర్జాతీయ ప్రమాణాలతో మూసీ నదీ తీరాన్ని అద్భుతంగా తీర్చిదిద్దుతామని భరోసా ఇచ్చారు. హైదరాబాద్‌లోని గుర్రంగూడలో నిర్వహించిన వనమహోత్సవ కార్యక్రమంలో పాల్గొని మొక్క నాటిన అనంతరం, అక్కడ ఏర్పాటు చేసిన అర్బన్ ఎకో పార్కు నమూనాను సీఎం పరిశీలించి అధికారుల నుంచి వివరాలు అడిగి తెలుసుకున్నారు.

ఈ సందర్భంగా ఏర్పాటు చేసిన బహిరంగ సభలో ముఖ్యమంత్రి రేవంత్ రెడ్డి మాట్లాడుతూ ప్రతిపక్షాలపై తీవ్రస్థాయిలో విమర్శలు గుప్పించారు. ప్రజలందరికీ కాలుష్య రహితమైన స్వచ్ఛమైన వాతావరణాన్ని అందించాలనే సంకల్పంతోనే తమ ప్రభుత్వం ముందడుగు వేస్తోందని చెప్పారు. భవిష్యత్తు తరాల అవసరాలను, నగర అభివృద్ధిని దృష్టిలో ఉంచుకుని 30 వేల ఎకరాల భారీ విస్తీర్ణంలో అత్యాధునిక ‘ఫ్యూచర్ సిటీ’ని నిర్మిస్తున్నట్లు వెల్లడించారు. రాజకీయంగా భవిష్యత్తు లేని కొంతమంది నాయకులు ఉద్దేశపూర్వకంగానే తాము అధికారంలోకి వస్తే ఫ్యూచర్ సిటీని రద్దు చేస్తామంటూ ప్రగల్భాలు పలుకుతున్నారని మండిపడ్డారు.

ప్రజలు సరైన సమయంలో సరైన తీర్పు ఇచ్చి వారి భవిష్యత్తును తేల్చేశారు కాబట్టే, ఇప్పుడు ఆ నేతలు ఫాంహౌస్‌లకే పరిమితం కావాల్సి వచ్చిందని సీఎం ఎద్దేవా చేశారు. అభివృద్ధిని అడ్డుకుంటూ ఫ్యూచర్ సిటీని రద్దు చేస్తానంటున్న సదరు నాయకుడు వచ్చే ఎన్నికల్లో సిద్దిపేటలో కూడా గెలవలేరని జోస్యం చెప్పారు. కొందరు కావాలనే నేషనల్ గ్రీన్ ట్రిబ్యునల్ (ఎన్జీటీ)లో కేసులు వేస్తూ ప్రాజెక్టులను ఆలస్యం చేయాలని చూస్తున్నారని ఆగ్రహం వ్యక్తం చేశారు. మూసీ నదిలో ఉన్న కాలుష్యం కంటే కల్వకుంట్ల కుటుంబం కడుపులోనే కాలుష్యం, కుళ్ళు ఎక్కువగా పేరుకుపోయాయని తీవ్ర వ్యాఖ్యలు చేశారు. ఎవరు ఎన్ని పితూరీలు చేసినా, కేసులు వేసినా వెనకడుగు వేసే ప్రసక్తే లేదని, అంతర్జాతీయ స్థాయిలో ‘భారత్ ఫ్యూచర్ సిటీ’ని నిర్మించి తెలంగాణ సత్తా చాటుతామని సీఎం రేవంత్ రెడ్డి గట్టిగా పునరుద్ఘాటించారు.