స్థానిక సంస్థల ఎన్నికలకు సిద్ధంకండి

అమరావతి: రాష్ట్రంలో పాలనను మరింత బలోపేతం చేసేందుకు త్వరలో స్థానిక సంస్థల ఎన్నికలు నిర్వహించనున్నట్లు ముఖ్యమంత్రి చంద్రబాబు నాయుడు ప్రకటించారు. అమరావతిలో జరిగిన కలెక్టర్ల సదస్సులో ‘స్వర్ణాంధ్ర విజన్ 2047’పై సమీక్షించిన ఆయన, రాష్ట్ర ఆర్థిక వృద్ధిని వేగవంతం చేయడంలో రవాణా వ్యయం తగ్గించడం అత్యంత కీలకమని స్పష్టం చేశారు. రహదారి మార్గం కంటే రైలు మార్గం ద్వారా రవాణా ఖర్చు తక్కువగా ఉన్నందున, పారిశ్రామిక ప్రాంతాలకు మెరుగైన రోడ్డు, రైలు అనుసంధానం కల్పించాలని అధికారులను ఆదేశించారు.

రాష్ట్రవ్యాప్తంగా సుమారు ఒక లక్ష కోట్ల విలువైన జాతీయ రహదారి ప్రాజెక్టులతో పాటు, భారీ ఎత్తున రైల్వే పనులను ప్రభుత్వం చేపడుతోందని సీఎం వెల్లడించారు. నాలుగు లేన్లతో రైల్వే మార్గాల విస్తరణ, ఎక్స్‌ప్రెస్‌ , లోకల్ ట్రైన్ల వంటి ఆధునిక ప్రాజెక్టులు అందుబాటులోకి రానున్నాయని తెలిపారు. రైల్వే ఓవర్ బ్రిడ్జిల నిర్మాణాలను యుద్ధ ప్రాతిపదికన పూర్తి చేయాలని, లాజిస్టిక్స్ పార్కుల ఏర్పాటు ద్వారా పెద్ద ఎత్తున ఆర్థిక కార్యకలాపాలను ప్రోత్సహించాలని కలెక్టర్లకు దిశానిర్దేశం చేశారు.

రాబోయే కాలంలో ఎల్‌నినో ప్రభావం వల్ల వర్షాలు తక్కువగా పడే అవకాశం ఉన్నందున, కలెక్టర్లు అప్రమత్తంగా ఉండాలని ముఖ్యమంత్రి హెచ్చరించారు. ముఖ్యంగా వర్షాధార, మెట్ట మరియు ఉద్యాన పంటలకు సంబంధించి పక్కాగా నీటి ప్రణాళికలు సిద్ధం చేసుకోవాలని సూచించారు. వీటితో పాటు ‘స్వచ్ఛ ఏపీ’ లక్ష్యంతో ప్రతి ఇంటి నుండి వ్యర్థాల సేకరణ, రహదారుల పరిశుభ్రతపై ప్రత్యేక దృష్టి సారించాలని సీఎం అధికారులను కోరారు.