దేశవ్యాప్తంగా ముగిసిన నీట్ (NEET-UG 2026) పరీక్ష
దేశవ్యాప్తంగా వైద్య విద్యార్థుల భవిష్యత్తును నిర్ణయించే అత్యంత కీలకమైన నేషనల్ ఎలిజిబిలిటీ కమ్ ఎంట్రన్స్ టెస్ట్ (NEET-UG) 2026 ఆదివారం అత్యంత కట్టుదిట్టమైన భద్రతా ఏర్పాట్ల మధ్య ముగిసింది. నేషనల్ టెస్టింగ్ ఏజెన్సీ (NTA) ఆధ్వర్యంలో నిర్వహించిన ఈ పరీక్షకు దేశవ్యాప్తంగా దాదాపు 23 లక్షల మంది విద్యార్థులు హాజరయ్యారు.
ఈ ఏడాది పరీక్షను నిర్వహించడంలో NTA భారీ ఏర్పాట్లు చేసింది. గతంలో ఎన్నడూ లేని విధంగా భారత్లోని 551 నగరాలతో పాటు, విదేశాల్లోని మరో 14 నగరాల్లో ఈ పరీక్షను నిర్వహించారు. విదేశాల్లో దుబాయ్, కువైట్ సిటీ, మస్కట్, దోహా వంటి ప్రముఖ నగరాల్లోని భారతీయ విద్యార్థుల కోసం ప్రత్యేక కేంద్రాలను ఏర్పాటు చేయడం విశేషం.
కేంద్ర విద్యాశాఖ మంత్రి ధర్మేంద్ర ప్రధాన్ స్వయంగా NTA ప్రధాన కార్యాలయాన్ని సందర్శించి పరీక్ష నిర్వహణ తీరును పర్యవేక్షించారు. పరీక్షా కేంద్రాల వద్ద ఎటువంటి అక్రమాలకు తావులేకుండా బయోమెట్రిక్ హాజరు, జామింగ్ పరికరాలు మరియు సిసిటివి నిఘాను ఏర్పాటు చేశారు. దాదాపు 6,000 మందికి పైగా అబ్జర్వర్లు క్షేత్రస్థాయిలో పరీక్షా సరళిని గమనించారు
పరీక్ష రాసిన విద్యార్థుల నుంచి మిశ్రమ స్పందన లభిస్తోంది. బయాలజీ మరియు ఫిజిక్స్ ప్రశ్నలు సులభంగా ఉన్నాయని మెజారిటీ విద్యార్థులు అభిప్రాయపడగా, కెమిస్ట్రీలో కొన్ని ప్రశ్నలు కాస్త క్లిష్టంగా ఉన్నాయని పేర్కొన్నారు.
వైద్య విద్యలో ప్రవేశాల కోసం నిర్వహించిన ఈ మహా పరీక్ష విజయవంతం కావడంతో అటు తల్లిదండ్రులు, ఇటు అధికారులు ఊపిరి పీల్చుకున్నారు. ఫలితాలు త్వరలోనే వెల్లడి కానున్నాయి.
