తెలుగు రాష్ట్రాల్లో విద్యార్థుల ఆత్మహత్యల నివారణకు “సైకాలజీ క్లాసులే సంజీవని”

టెన్త్, ఇంటర్మీడియట్ విద్యార్థులకు క్లాస్ రూముల్లో థియరీతో పాటు మానసిక వ్యక్తిత్వ వికాసానికి సంబంధించిన తరగతులు కనీసం వారానికి ఒకటి లేదా ప్రతి శనివారం నిపుణులచే ఇప్పించాల్సిన అవసరం ఉంది. టెన్త్, ఇంటర్ కు వచ్చిన విద్యార్థులు యుక్త వయసులో ఉంటారు వారు, ఇంట్లో తల్లిదండ్రులు, కాలేజీల్లో లెక్చరర్లకు ఎదురు తిరిగి మాట్లాడే మనస్తత్వం కలిగి ఉంటారు. ఈ వయసులోని విద్యార్థులపై సమాజ ప్రభావం, సినిమాల ప్రభావం, సీరియళ్ల ప్రభావం ఎక్కువగా పడుతుంది. పుస్తకాల మోత కాస్త తగ్గినా.. మనసుపై ఒత్తిడి మాత్రం పెరిగింది. విద్యార్థులకు కావాల్సింది మార్కులు కాదు, మానసిక భరోసా అని తల్లిదండ్రులు, ఉపాధ్యాయులు తెలుసుకొని దానికి పరిష్కారం కనుకున్న రోజే విద్యార్థుల ఆత్మహత్యలకు ఫుల్ స్టాప్ పెట్టవచ్చు. ఇంట్లో తల్లిదండ్రులు యుక్త వయసు వచ్చిన పిల్లల ఎదురుగా కొట్లాడటంగానీ, తిట్టుకోవడం గానీ చేయరాదు. ఇదే వయసులోని పిల్లలపై స్నేహితుల ప్రభావం, యువతీయువకులపై ఆకర్షణలు పెరుగుతాయి. కాబట్టి వారి మానసిక ఎదుగుదలపై తల్లిదండ్రులు, టీచర్లు, లెక్చరర్లు నిఘా పెట్లాల్సిన అవసరం ఉంది. ఎందుకంటే యుక్త వయసులో ఉన్న విద్యార్థుల మనసు గందరగోళంగా ఉంటుంది. వాళ్ల మనసుకు నచ్చిన పని చేస్తూ ఉంటారు. నిజానికి టీచర్లు,లెక్చరర్లు విద్యార్థుల మానసిక స్థితిపై వారికి టీచర్ ట్రైనింగ్ సమయంలోనే సైకాలజీ సబ్జెక్టు నేర్పిస్తారు. ప్రతి పాఠశాలలో కచ్చితంగా ఒక సైకాలజీ టీచర్ ఉండే విధంగా కేంద్ర, రాష్ట్ర ప్రభుత్వాలు చర్య తీసుకోవాల్సిన అవసరం ఎంతైనా ఉంది. పరీక్షలు జీవితానికి కొలమానం కాదు.. విద్యార్థుల ప్రాణం ‘ర్యాంకు’ కన్నా మిన్న అని ఉపాధ్యాయులు, తల్లిదండ్రులు గుర్తించుకోవాలి.కొందరు విద్యార్థులు పరీక్షలు బాగానే రాస్తారు.. ఫలితాలంటేనే భయపడతారు. టెన్త్, ఇంటర్ విద్యార్థులు పరీక్షలు పరీక్షలు రాస్తున్నప్పుడు లేదా ఫలితాలు వచ్చే ముందర ముఖ్యంగా తల్లిదండ్రులు, ఉపాధ్యాయులు వారి మానసిక స్థితిపై నిఘా పెట్టాల్సిన అవసరం ఉంది. విద్యార్థులకు ఏది ఇష్టమో, ఏది కష్టమో తెలుసుకోవాలి. ప్రతి ఏడాది ఇంటర్ లేదా టెన్త్ ఫలితాల సమయంలో రెండు తెలుగు రాష్ట్రాల విద్యార్థులలో కొంతమంది ఫలితాలు రాకముందే లేదా వచ్చిన తర్వాత ఫెయిల్ అవుతానన్న భయంతో ఆత్మహత్యలకు పాల్పడుతున్నారు. ఫలితాలు వచ్చాక ఫెయిల్ అయిన విద్యార్థులలో కొంత మంది ఆత్మహత్యలు చేసుకుంటున్నారు. ఈ తేడా ఎక్కడ ఉంది అంటే వారి వారి మానసిక స్థితిని అంచనా వేయకపోవడమేనని తెలుస్తోంది.

విద్యార్థుల ఆత్మహత్యలు: గణాంక విశ్లేషణ (గత 10 ఏళ్లు) గత పదేళ్లలో (2014-2024) రెండు రాష్ట్రాల్లో విద్యార్థుల ఆత్మహత్యల ధోరణి ఆందోళనకరంగా ఉంది.

1. తెలంగాణ గణాంకాలు:
   తెలంగాణ రాష్ట్రం ఏర్పడినప్పటి నుంచి (2014) 2021 వరకు సుమారు 3,600 మందికి పైగా విద్యార్థులు ఆత్మహత్య చేసుకున్నట్లు NCRB డేటా వెల్లడిస్తోంది. ప్రతి ఏటా సగటున 400 నుంచి 500 మంది విద్యార్థులు తనువు చాలిస్తున్నారు. 2019లో ఇంటర్మీడియట్ ఫలితాల్లో దొర్లిన సాంకేతిక లోపాల కారణంగా ఆ ఏడాది ఫలితాల తర్వాత కేవలం కొద్ది రోజుల్లోనే 21 మంది విద్యార్థులు ఆత్మహత్య చేసుకున్న ఘటన దేశవ్యాప్త సంచలనం సృష్టించింది. మొత్తం (2014-2024) అంచనా ప్రకారం గత పదేళ్లలో ఈ సంఖ్య సుమారు 4,500 – 5,000 మధ్యలో ఉండే అవకాశం ఉందని నిపుణులు చెబుతున్నారు.
2. ఆంధ్రప్రదేశ్ గణాంకాలు:
   ఆంధ్రప్రదేశ్‌లో కూడా పరిస్థితి తీవ్రంగానే ఉంది. 2023లో టెన్త్ క్లాస్ ఫలితాల తర్వాత అత్యధికంగా విద్యార్థులు ఫెయిల్ అయిన రాష్ట్రాల్లో ఏపీ ఒకటిగా నిలిచింది. ఫెయిల్ అయిన విద్యార్థులు 2023లో సుమారు 2.55 లక్షల మంది పదో తరగతి విద్యార్థులు ఫెయిల్ అయ్యారు. ఏపీలో ఏటా సగటున 350 నుంచి 450 మంది విద్యార్థులు వివిధ విద్యా కారణాలతో ఆత్మహత్యలకు పాల్పడుతున్నారు. గత పదేళ్లలో ఈ సంఖ్య సుమారు 4,000 పైచిలుకు ఉన్నట్లు అంచనా.

తెలుగు రాష్ట్రాల్లో ప్రతి సంవత్సరం విద్యా పరీక్షలకు హాజరయ్యే విద్యార్థుల సంఖ్య, ఉత్తీర్ణత సాధించలేకపోతున్న వారి గణాంకాలను పరిశీలిస్తే పరిస్థితి తీవ్రత అర్థమవుతుంది. ఆంధ్రప్రదేశ్, తెలంగాణ రాష్ట్రాల్లో కలిపి ఏటా సుమారు 10 నుంచి 12 లక్షల మంది విద్యార్థులు పదో తరగతి పరీక్షలు రాస్తున్నారు. వీరిలో వివిధ కారణాల వల్ల సుమారు 15 నుంచి 25 శాతం మంది విద్యార్థులు ఉత్తీర్ణత సాధించలేకపోతున్నారు, అంటే దాదాపు 2 లక్షల మంది విద్యార్థులు ఏటా పదో తరగతిలో ఫెయిల్ అవుతున్నారు. ఇక ఇంటర్మీడియట్ విషయానికి వస్తే, రెండు రాష్ట్రాల్లో కలిపి ప్రతి సంవత్సరం సుమారు 9 నుంచి 10 లక్షల మంది విద్యార్థులు పరీక్షలకు హాజరవుతున్నారు. ఇంటర్మీడియట్‌లో ఫెయిల్యూర్ రేటు పదో తరగతి కంటే ఎక్కువగా ఉండటం గమనార్హం. ఇక్కడ సగటున 30 నుంచి 40 శాతం మంది విద్యార్థులు ఉత్తీర్ణత సాధించలేకపోతున్నారు. దీని ప్రకారం, ప్రతి ఏటా సుమారు 3.5 లక్షల మంది విద్యార్థులు ఇంటర్మీడియట్ పరీక్షల్లో తప్పి తీవ్ర మానసిక ఒత్తిడికి లోనవుతున్నారు. మొత్తం మీద రెండు రాష్ట్రాల్లో కలిపి ఏటా సగటున 5 లక్షల మందికి పైగా విద్యార్థులు టెన్త్, ఇంటర్ పరీక్షల్లో ఫెయిల్ అవుతున్నట్లు గణాంకాలు చెబుతున్నాయి.

పరిశోధనల ప్రకారం విద్యార్థులు ఆత్మహత్యలకు పాల్పడటానికి ప్రధానంగా మూడు రకాల ఒత్తిళ్లు పనిచేస్తున్నాయి. ఫలితాలకు ముందు భయం ఎందుకంటే పేరెంట్స్ అంచనాలను అందుకోలేమన్న ఆందోళన, సమాజంలో అవమానం జరుగుతుందన్న భయం విద్యార్థుల్లో కలగడం. ఫలితాల తర్వాత నిరాశ ఎందుకంటే ముఖ్యంగా 1 లేదా 2 సబ్జెక్టుల్లో ఫెయిల్ అయిన విద్యార్థులే ఎక్కువగా ఆత్మహత్యలకు పాల్పడుతున్నట్లు NCRB విశ్లేషణలో తేలింది. కార్పొరేట్ కాలేజీల ఒత్తిడి వల్ల గొర్రెల మందలా ర్యాంకుల కోసం విద్యార్థులను ఉదయం 6 నుంచి రాత్రి 10 వరకు చదివించే “షెడ్యూల్స్” వారి మానసిక స్థితిని దెబ్బతీస్తున్నాయి. ఈ పరిస్థితిని అరికట్టడానికి రెండు రాష్ట్రాలు కొన్ని కీలక చర్యలు చేపట్టాయి. సప్లిమెంటరీ పరీక్షలు తొందరగా పెడుతున్నారు. ఫెయిల్ అయిన వెంటనే నెల రోజుల్లోనే పరీక్ష రాసే అవకాశం ఇవ్వడం వల్ల “ఏడాది వృధా అవుతుంది” అన్న భయం తగ్గింది. ‘రోషిణి’ (Roshni) వంటి హెల్ప్‌లైన్ నంబర్ల ద్వారా కౌన్సెలింగ్ ఇస్తున్నారు. మార్కులకు బదులు గ్రేడింగ్ తీసుకురావడం వల్ల విద్యార్థుల మధ్య అనారోగ్యకరమైన పోటీని తగ్గించే ప్రయత్నం జరుగుతోంది. దానితో పాటు టెన్త్, ఇంటర్ విద్యార్థులు శారీరక, మానసిక మార్పులు అధికంగా ఉండే వయసులో ఉంటారు. ఈ సమయంలో పాఠశాలలు, కళాశాలల్లో వారానికి ఒకసారి సైకలాజికల్ క్లాసులు నిర్వహించడం వల్ల విప్లవాత్మకమైన మార్పులు వచ్చే అవకాశం ఉంది.

1. ఒత్తిడి నిర్వహణ
   విద్యార్థులు ఎదుర్కొనే అతిపెద్ద సమస్య పరీక్షల భయం. సైకాలజిస్టులు క్లాసులు తీసుకోవడం ద్వారా “పరీక్షలు అనేవి జీవితంలో ఒక భాగం మాత్రమే” అనే విషయాన్ని వారు అర్థం చేసుకుంటారు. దీనివల్ల ఫెయిల్ అవుతామనే భయంతో తీసుకునే విపరీత నిర్ణయాలు (ఆత్మహత్యలు) గణనీయంగా తగ్గుతాయి.
2. ప్రశ్నాపత్రాల ద్వారా ముందస్తు గుర్తింపు
   కేవలం క్లాసులు చెప్పడమే కాకుండా, చిన్న చిన్న సైకలాజికల్ టెస్టులు నిర్వహించడం వల్ల: తీవ్రమైన ఒత్తిడి లేదా డిప్రెషన్‌లో ఉన్న విద్యార్థులను ముందుగానే గుర్తించవచ్చు. ఏ విద్యార్థి ఏ సబ్జెక్టులో ఇబ్బంది పడుతున్నారో లేదా ఏ రకమైన సామాజిక ఇబ్బందులు ఎదుర్కొంటున్నారో తెలుస్తుంది. లెర్నింగ్ డిజబిలిటీస్ (చదవడంలో ఇబ్బందులు) ఉన్న పిల్లలకు ప్రత్యేక శిక్షణ ఇప్పించవచ్చు.
3. కెరీర్ క్లారిటీ
   చాలా మంది విద్యార్థులు తాము ఏ గ్రూప్ తీసుకోవాలి, భవిష్యత్తులో ఏం కావాలి అనే గందరగోళంలో ఉంటారు. వ్యక్తిత్వ వికాస నిపుణులు వారి ఆసక్తులను బట్టి సరైన మార్గదర్శకత్వం చేయగలరు. దీనివల్ల ఇష్టం లేని చదువులను బలవంతంగా చదివి విఫలం కావడం తగ్గుతుంది.
4. ఎమోషనల్ ఇంటెలిజెన్స్
   ప్రస్తుత విద్యావిధానం కేవలం ఐక్యూ (IQ) మీద దృష్టి పెడుతోంది. కానీ జీవితంలో గెలవాలంటే ఈక్యూ చాలా ముఖ్యం. ఓటమిని ఎలా తట్టుకోవాలి, తోటివారితో ఎలా ప్రవర్తించాలి, కోపాన్ని ఎలా నియంత్రించుకోవాలి వంటి అంశాలు నేర్చుకోవడం వల్ల వారు పరిణతి చెందిన వ్యక్తులుగా ఎదుగుతారు.
5. తల్లిదండ్రులు – టీచర్ల మధ్య వారధి
   సైకాలజిస్టులు కేవలం విద్యార్థులకే కాకుండా, టీచర్లకు, తల్లిదండ్రులకు కూడా కౌన్సెలింగ్ ఇవ్వగలరు. పిల్లలపై అతిగా అంచనాలు పెంచుకోకుండా వారిని ఎలా ప్రోత్సహించాలో తల్లిదండ్రులకు వివరించవచ్చు. ఒక విద్యార్థి చదువులో రాణించాలంటే మెదడుకు పుస్తకాల్లోని జ్ఞానం ఎంత అవసరమో, మనసుకు ధైర్యం కూడా అంతే అవసరం. వారానికి ఒక క్లాసు అనేది విద్యార్థుల ఆలోచనా విధానాన్ని మార్చి, వారిలో ఆత్మవిశ్వాసాన్ని నింపుతుంది. ఫలితంగా పరీక్షల ఫలితాల సమయంలో వచ్చే విషాద వార్తలను చాలా వరకు అరికట్టవచ్చు. ఒక రకంగా చెప్పాలంటే, ఇది విద్యావ్యవస్థలో “మెంటల్ హెల్త్ ఫస్ట్ ఎయిడ్” లా పనిచేస్తుంది. శారీరక గాయం తగిలినప్పుడు మనం వెంటనే చేసే ‘ప్రథమ చికిత్స’ లాగే, ఎవరైనా మానసిక ఒత్తిడికి, ఆందోళనకు లేదా కృంగుబాటుకు లోనైనప్పుడు.. పరిస్థితి విషమించకుండా వారికి ప్రాథమికంగా అందించే మానసిక భరోసా మరియు సహాయాన్ని ‘మానసిక ఆరోగ్య ప్రథమ చికిత్స’ అంటారు. ఆత్మహత్య అనేది దేనికీ పరిష్కారం కాదు. పరీక్షలు జీవితంలో ఒక భాగం మాత్రమే, జీవితమే పరీక్ష కాదు. మీకు ఒత్తిడిగా అనిపిస్తే వెంటనే నమ్మకమైన వారితో మాట్లాడండి లేదా హెల్ప్‌లైన్ సెంటర్లను (040-2785 2355) సంప్రదించండి. జ్ఞాపకశక్తిని పరీక్షించే ప్రశ్నపత్రాల కంటే.. వారి ఆలోచనా శక్తిని తడిమి చూసే ‘సైకలాజికల్ అసెస్‌మెంట్’ నేడు ఎంతో అవసరం అని నిపుణులు అంటున్నారు.