ఫీజు కోసం.. ఎల్కేజీ పాప ఖైదీ
అమానుష ఘటన.. ఆంధ్రప్రదేశ్లోని పశ్చిమ గోదావరి జిల్లా, రంగమ్మన్నారుపేటలో మానవత్వం మంటగలిసే ఘటన వెలుగుచూసింది. ‘సన్ షైన్ స్కూల్’లో ఎల్కేజీ చదువుతున్న మౌనిక అనే చిన్నారిని, ఫీజు బకాయి ఉందన్న సాకుతో పాఠశాల యాజమాన్యం ఏకంగా 5 గంటల పాటు ఒక గదిలో బంధించింది. బయటపడ్డ వైనం.. స్కూల్ సమయం ముగిసినా పాప ఇంటికి రాకపోవడంతో ఆందోళన చెందిన తల్లిదండ్రులు పాఠశాలకు వెళ్లి ఆరా తీశారు. అప్పుడు అసలు విషయం బయటపడటంతో వారు హతాశులయ్యారు. అభం శుభం తెలియని పసిపాప ఏడుస్తున్నా కనికరం లేకుండా గదికి తాళం వేయడంపై స్థానికులు తీవ్ర ఆగ్రహం వ్యక్తం చేస్తున్నారు. తల్లి ఆవేదన.. “చదువు నేర్పిస్తారని స్కూల్కు పంపిస్తే, నా బిడ్డను జైల్లో పెట్టినట్టు బంధిస్తారా?” అంటూ ఆ చిన్నారి తల్లి కన్నీరుమున్నీరయ్యారు. ఫీజు విషయంలో ఏదైనా సమస్య ఉంటే తల్లిదండ్రులతో మాట్లాడాలి కానీ, పసిపాపపై ఇలాంటి అమానుష చర్యకు పాల్పడటం విద్యా వ్యవస్థకే మచ్చ అని కుటుంబ సభ్యులు మండిపడుతున్నారు. చర్యలకు డిమాండ్.. విద్యా హక్కు చట్టాలను తుంగలో తొక్కి, చిన్నారిపై మానసిక దాడికి పాల్పడిన సన్ షైన్ స్కూల్ గుర్తింపును తక్షణమే రద్దు చేయాలని విద్యార్థి సంఘాలు, స్థానికులు డిమాండ్ చేస్తున్నారు. ఈ ఘటనపై విద్యాశాఖ అధికారులు ఎలాంటి చర్యలు తీసుకుంటారో వేచి చూడాలి.