సంజూ సెంచరీ … చెన్నై విక్టరీ

సంజూ శామ్సన్ విధ్వంసం ఐపీఎల్ 2026 సీజన్‌లో భాగంగా ముంబైలోని వాంఖడే స్టేడియంలో జరిగిన ఈ హై-వోల్టేజ్ పోరులో చెన్నై సూపర్ కింగ్స్ , ముంబై ఇండియన్స్ పై భారీ విజయాన్ని సాధించింది . టాస్ ఓడి మొదట బ్యాటింగ్ చేసిన చెన్నై సూపర్ కింగ్స్ నిర్ణీత 20 ఓవర్లలో 6 వికెట్ల నష్టానికి 207 పరుగుల భారీ స్కోరు సాధించింది. చెన్నై ఇన్నింగ్స్‌కు వెన్నెముకగా నిలిచిన సంజూ శామ్సన్ తన అద్భుత ఫామ్‌ను కొనసాగిస్తూ సెంచరీతో కదం తొక్కారు. కేవలం 54 బంతుల్లోనే 10 ఫోర్లు, 6 భారీ సిక్సర్ల సాయంతో 101* పరుగులు చేసి అజేయంగా నిలిచారు. ఇన్నింగ్స్ చివరి బంతికి ఫోర్ కొట్టి శతకాన్ని పూర్తి చేయడం మ్యాచ్‌కే హైలైట్‌గా నిలిచింది. మిగతా బ్యాటర్లలో రుతురాజ్ గైక్వాడ్ (22), డెవాల్డ్ బ్రెవిస్ (21) పర్వాలేదనిపించగా, ముంబై బౌలర్లలో గజన్‌ఫర్, అశ్విన్ కుమార్ తలా రెండు వికెట్లు పడగొట్టారు. 208 పరుగుల కఠిన లక్ష్యంతో బరిలోకి దిగిన ముంబై ఇండియన్స్ , చెన్నై బౌలర్ల ధాటికి ఏ దశలోనూ కోలుకోలేకపోయింది. ముంబై బ్యాటర్లలో తిలక్ వర్మ (37), సూర్యకుమార్ యాదవ్ (36) మినహా మిగిలిన వారు ఘోరంగా విఫలమయ్యారు. చెన్నై బౌలర్ అకేల్ హొసైన్ తన స్పిన్ మాయాజాలంతో 4 వికెట్లు తీసి ముంబై నడ్డి విరిచారు. చివరలో గుర్జప్‌నీత్ సింగ్ వేసిన 19వ ఓవర్‌లో జస్ప్రీత్ బుమ్రా.. వికెట్ కీపర్ సంజూ శామ్సన్‌కు క్యాచ్ ఇచ్చి చివరి వికెట్‌గా వెనుదిరిగారు. దీంతో ముంబై 104 పరుగులకే ఆలౌట్ అయ్యింది.ఈ ఘన విజయంతో చెన్నై సూపర్ కింగ్స్ 103 పరుగుల భారీ తేడాతో ముంబైపై చారిత్రక విజయాన్ని అందుకుంది. ఐపీఎల్ చరిత్రలో ముంబైపై చెన్నై తరఫున సెంచరీ చేసిన తొలి బ్యాటర్‌గా సంజూ శామ్సన్ రికార్డు సృష్టించారు. అంతేకాకుండా, ఈ సీజన్‌లో సంజూకు ఇది రెండో శతకం కావడం గమనార్హం. వాంఖడే స్టేడియం వేదికగా సంజూ శామ్సన్ ప్రదర్శించిన ఈ ఆల్ రౌండ్ షో (సెంచరీ , కీపింగ్‌లో క్యాచ్‌లు) చెన్నై అభిమానులకు కంటినిండా విందును అందించింది.