కూకట్ పల్లిలో కాపు ఓటర్లు డిసైడింగ్ ఫ్యాక్టర్ కాబోతున్నారా?
కూకట్ పల్లి నియోజకవర్గంలో కమ్మ, కాపులు ఎవరికి ఓటేస్తే వారికే విజయం సొంతమవుతుంది. అది కూడా ఆంధ్ర ప్రాంతం నుంచి వచ్చి ఇక్కడ స్థిర నివాసం ఏర్పాటు చేసుకున్నవారు ఎన్నికల్లో గెలుపు ఓటములపై ప్రభావితం చూపుతారు. హైదరాబాద్‌లో ప్రతిష్టాత్మక నియోజకవర్గం కూకట్‌పల్లిలో ఎవరు గెలుస్తారన్నదానిపై ఎంతో ఉత్కంఠ నెలకొంది. ఆసియాలోనే అతిపెద్ద కాలనీగా కూకట్ పల్లి హౌసింగ్ బోర్డు కాలనీ గుర్తింపు పొందింది. హైదరాబాద్ అభివృద్ధి అంతా కూకట్ పల్లిలో కన్పిస్తోంది. హైటెక్ సిటీతో లింకు ఏర్పడిన తర్వాత ఈ ప్రాంతం రాష్ట్రంలోనే సంపన్న ప్రాంతంగా మారిపోయింది. కూకట్ పల్లిలో కాస్ట్ ఆఫ్ లివింగ్ గత పదేళ్ల క్రితం ఉన్నదానికి నేటికి రెట్టింపు అయ్యింది. అపార్ట్మెంట్ వాల్యూ సైతం గణనీయంగా పెరిగాయ్. ఇక గజం లక్ష రూపాయల నుంచి ధర పలుకుతోంది. కూకట్ పల్లి అసెంబ్లీ నియోజకవర్గంలో కూకట్ పల్లి, అల్లాపూర్, బాలానగర్, మూసాపేట్, ఫతేనగర్, బోయినపల్లి, ఫిరోజ్ గూడ, బేగంపేట్ కొంత ప్రాంతం ఉన్నాయి. ఈ నియోజకవర్గంలో ఈసారి జరగనున్న అసెంబ్లీ ఎన్నిక ప్రాధాన్యత సంతరించుకొంది. నియోజకవర్గంలో పాతుకుపోయిన బీఆర్ఎస్ అభ్యర్థి మాధవరం కృష్ణారావుకు ఇప్పుడు పెద్ద సంకటం వచ్చి పడంది.
ఆంధ్రా నుంచి వచ్చి స్థిర నివాసం ఏర్పాటు చేసుకున్న ఓటర్ల ప్రభావం ఈ నియోజకవర్గంలో చాలా ఎక్కువ. మరీ ముఖ్యంగా ఈ నియోజకవర్గంలో కాపు, కమ్మతోపాటు, శ్రీకాకుళం వలస కూలీలు గణనీయమైన ప్రభావం చూపించే అవకాశం ఉంది. కూకట్ పల్లి నియోజకవర్గంలో కాపులు (ఓసీ, తూర్పు కాపు, మున్నురు కాపు కలిపి) సుమారుగా 20 శాతానికి పైగా ఉన్నారు. కమ్మ సామాజికవర్గానికి చెందిన ఓటర్లు సైతం 8 నుంచి 10 శాతం వరకు ఉన్నారు. ముదిరాజ్, గౌడ్, యాదవ వర్గాలకు చెందినవారు సుమారు 30 శాతానికి పైగా ఉన్నారు. ఎస్సీ, ఎస్టీ 11-12 శాతం, మైనార్టీలు 10 నుంచి 15 శాతం మైనార్టీలు కూడా ఇక్కడ కీలక పాత్ర పోషించే అవకాశం ఉంది. రెడ్డి, వైశ్యులు ప్రముఖంగా ఉన్నారు. కూకట్ పల్లిలో బీఆర్ఎస్ తరపున మాధవరం కృష్ణరావు మూడోసారి విజయం సాధించి హ్యాట్రిక్ సాధించాలని భావిస్తున్నారు. ఇక కాంగ్రెస్ పార్టీ నుంచి బండి రమేష్ ఎన్నికల్లో తొలిసారి పోటీ చేస్తున్నారు. ఇక ముమ్మారెడ్డి ప్రేమ్ కుమార్ జనసేన-బీజేపీ ఉమ్మడి అభ్యర్థిగా బరిలో దిగుతున్నారు. ఇక్కడ్నుంచి బీఎస్పీ సైతం అభ్యర్థిని పోటీకి దించింది. కూకట్ పల్లి నియోజకవర్గంలో మొత్తం 417 పోలింగ్ బూత్‌ లకు వ్యాపించి ఉండగా మొత్తం 4,47,523 ఓట్లున్నాయి. వాటిలో పురుషులు 2,34,575 ఓట్లుకాగా, మహిళలు 2,12,828 ఓట్లు, ట్రాన్స్‌జెండర్ 120 ఉన్నాయి.
