సల్మాన్‌ను చంపేస్తామంటూ మరోసారి బెదిరింపులు..
బాలీవుడ్‌ నటుడు సల్మాన్‌ ఖాన్‌కు మరోసారి బెదిరింపులు వచ్చాయి. గ్యాంగ్‌స్టర్‌ లారెన్స్‌ బిష్ణోయ్‌ గ్యాంగ్‌ నుంచి సల్మాన్‌కు ఈ-మెయిల్‌ ద్వారా బెదిరింపులు వచ్చాయి. దీంతో సల్మాన్‌ బాంద్రా పోలీసులకు ఫిర్యాదు చేయడంతో పోలీసులు అప్రమత్తం అయ్యారు. ఆయనకు వై ప్లస్‌ కేటగిరీ భద్రత పెంచారు. సల్మాన్‌ ఖాన్‌ను చంపేస్తామంటూ ఆయన కార్యాలయానికి శనివారం మధ్యాహ్నం ఓ బెదిరింపు ఈ-మెయిల్‌ వచ్చింది. దీంతో సల్మాన్‌ టీం వెంటనే పోలీసులను ఆశ్రయించారు. వారు ఇచ్చిన ఫిర్యాదు మేరకు ఇప్పటికే జైలులో శిక్ష అనుభవిస్తున్న గ్యాంగ్‌స్టర్లు లారెన్స్‌ బిష్ణోయ్‌, గోల్డీ బ్రార్‌, రోహిత్‌ గార్గ్‌లపై బాంద్రా పోలీసులు కేసు నమోదు చేశారు. ఐపీసీ 506(2), 120 (బీ) 34 సెక్షన్ల కింద ఎఫ్‌ఐఆర్‌లు నమోదు చేశారు. ఈ నేపథ్యంలో సల్మాన్‌ ఖాన్‌కు ముప్పుఉందని గుర్తించిన బాంద్రా పోలీసులు ఆయన నివాసం వద్ద వై ప్లస్‌ కేటగిరి భధ్రతను కల్పించారు.
