మనశ్శాంతి కోసం 53 పెళ్ళిళ్లు..!

ఒక పెళ్లికే మనశ్శాంతి లేకుండా పోతోందని అనేక మంది పురుషులు వాపోతుంటారు. సౌదీ అరేబియాకు చెందిన ఓ వ్యక్తి మాత్రం మనశ్శాంతి కోసం ఒకటి కాదు.. రెండు కాదు.. ఏకంగా 53 పెళ్లిళ్లు చేసుకున్నాడు. పైగా, ఇప్పుడు 63 ఏళ్ల వయసున్న అతడు 43 ఏళ్లకే 53 పెళ్ళిళ్లు చేసుకోవడం విశేషం. చివరకు ఈ పెళ్లిళ్లతో తనకు మనశ్శాంతి దొరకదనే నిజాన్ని గ్రహించాడు. తాజాగా వెలుగులోకి వచ్చిన పెళ్లిళ్ల వివరాలు.. సౌదీ అరేబియాకు చెందిన అబూ అబ్దుల్లా (63) ఈ శతాబ్దపు బహుభార్యావేత్త అనే బిరుదును సంపాదించుకున్నాడు. అతను తాజాగా ఇచ్చిన ఓ ఇంటర్వ్యూలో తన వివాహాల గురించి మాట్లాడాడు.

20 ఏళ్ల వయసులో తొలి వివాహం..

‘నేను 20 సంవత్సరాల వయసులో మొదటి వివాహం చేసుకున్నాను. ఆమె నాకంటే ఆరేళ్లు పెద్దది. ఆ వివాహం తర్వాత నేను మళ్లీ పెళ్లి చేసుకోవాలనుకోలేదు. ఎందుకంటే అప్పుడు నేను సంతోషంగానే ఉన్నాను. పిల్లలు కూడా కలిగారు. అయితే ఆ తర్వాత మా మధ్య విభేదాలు మొదలయ్యాయి. 23 సంవత్సరాల వయస్సులో రెండో పెళ్లి చేసుకోవాలని నిర్ణయించుకున్నా. నా నిర్ణయాన్ని మొదటి భార్యకు చెప్పి రెండో పెళ్లి చేసుకున్నా. ఆ తర్వాత ఇద్దరు భార్యలు తమలో తాము గొడవ పడుతూ.. నన్ను ఇబ్బంది పెట్టారు. అప్పుడు ఆ ఇద్దరికీ విడాకులిచ్చి మూడో, నాలుగో పెళ్లి చేసుకున్నాను’ అని చెప్పాడు.

ఇప్పుడు ఒకే భార్యతో కాపురం..

‘అయినా నాకు సంతోషం కలగలేదు. నన్ను సంతోష పెట్టగల మహిళ కోసం వెతుకుతూ.. చాలా పెళ్లిళ్లు చేసుకున్నాను. నా జీవితంలో అతి చిన్న వివాహ బంధం కేవలం ఒక రాత్రి మాత్రమే కొనసాగింది. నా భార్యల్లో చాలా మంది సౌదీ మహిళలే. కొందరు విదేశీ మహిళలు కూడా ఉన్నారు. విదేశీ వ్యాపార పర్యటనల సమయంలో వారిని పెళ్లి చేసుకున్నా. నిజానికి ప్రపంచంలోని ప్రతి పురుషుడు ఒకే స్త్రీతో కలకాలం ఉండాలని కోరుకుంటాడు’ అని అబ్దుల్లా తన సుదీర్ఘ వివాహ బంధం గురించి వివరించాడు. అయితే.. తానిప్పుడు ఒక భార్యతోనే బతుకుతున్నానని, మరో పెళ్లి చేసుకోవాలనే ఆలోచన లేదని అబ్దుల్లా చెప్పాడు.