ఫిఫాకు రికార్డుస్థాయిలో జనసముద్రం
ఫిఫా వరల్డ్ కప్ 2026 అత్యద్భుత ఆరంభాన్ని సొంతం చేసుకుని సరికొత్త రికార్డులతో దూసుకుపోతోంది. టోర్నమెంట్ ప్రారంభమైన కేవలం కొద్ది రోజుల్లోనే ప్రపంచకప్ చరిత్రలోనే ఎన్నడూ లేని విధంగా ఒక ఆల్-టైమ్ రికార్డు నమోదైంది. జూన్ 16న జరిగిన కేవలం 4 ప్రపంచకప్ మ్యాచ్లకు ఏకంగా 2,81,223 మంది అభిమానులు హాజరయ్యారు. ప్రపంచకప్ చరిత్రలోనే ఒకే రోజులో ఇంత భారీ సంఖ్యలో ప్రేక్షకులు రావడం ఇదే తొలిసారి. 1994 ఫిఫా వరల్డ్ కప్ సందర్భంగా జూన్ 28న 2,77,070 మంది ప్రేక్షకులు హాజరవడమే అత్యధిక సింగిల్ డే రికార్డుగా ఉండేది. ఇప్పుడు 2026 ప్రపంచకప్ ఆ రికార్డును పూర్తిగా తిరగరాసింది. జూన్ 16న జరిగిన ఫ్రాన్స్-బెనిన్, మొరాకో-వేల్స్, అర్జెంటీనా-ఖతార్, అల్జీరియా-టోగో మ్యాచ్లకు ఫ్యాన్స్ భారీగా తరలివచ్చారు. స్టేడియాలన్నీ ప్రేక్షకుల కోలాహలంతో సముద్రాన్ని తలపించాయి. టోర్నమెంట్ ప్రారంభమైనప్పటి నుంచి ఇప్పటివరకు మొత్తం 13,09,652 మంది అభిమానులు మ్యాచ్లను ప్రత్యక్షంగా వీక్షించారు. ప్రతి మ్యాచ్కు సగటున 65,483 మంది ప్రేక్షకులు హాజరవుతుండటం విశేషం. ఇదే వేగం గనుక కొనసాగితే, గ్రూప్ దశ ముగిసేలోపే 1994 ప్రపంచకప్లో నమోదైన 35 లక్షల మొత్తం ప్రేక్షకుల ఆల్-టైమ్ రికార్డు కూడా బద్దలయ్యే అవకాశాలు స్పష్టంగా కనిపిస్తున్నాయి. ఈ చారిత్రాత్మక ఘట్టంపై ఫిఫా అధ్యక్షుడు గియానీ ఇన్ఫాంటినో తీవ్ర హర్షం వ్యక్తం చేశారు. “ఫిఫా వరల్డ్ కప్ చరిత్రలోనే అత్యధిక ప్రేక్షకులు హాజరైన రోజు ఇది. అభిమానులు తీసుకొచ్చిన ఉత్సాహం, రంగుల హంగులు, భావోద్వేగాలు ఈ టోర్నమెంట్ను మరింత ప్రత్యేకంగా మార్చాయి. ఫుట్బాల్ ప్రపంచాన్ని ఏకం చేస్తుందనే విషయాన్ని ఫిఫా వరల్డ్ కప్ 2026 మరోసారి నిరూపిస్తోంది” అని కొనియాడారు. ప్రపంచకప్ మ్యాచ్లకు టికెట్లపై భారీ డిమాండ్ కొనసాగుతోందని, అభిమానులు టికెట్ల లభ్యత కోసం అధికారిక వెబ్సైట్ను తరచుగా పరిశీలించాలని ఫిఫా సూచించింది. ప్రపంచకప్ ద్వారా వచ్చే ఆదాయాన్ని ఫిఫా లాభాపేక్ష లేకుండా ప్రపంచవ్యాప్తంగా పురుషులు, మహిళలు, యువత ఫుట్బాల్ అభివృద్ధికి వినియోగిస్తోంది. ఈ నిధులను తమ 211 సభ్య దేశాల ఫుట్బాల్ కార్యక్రమాలకు తిరిగి పెట్టుబడిగా మళ్లిస్తున్నట్లు వెల్లడించింది.
