ఉద్యోగం మారితే.. పర్సనల్ లోన్పై ప్రభావం!
చాలామంది తమ తక్షణ ఆర్థిక అవసరాల కోసం పర్సనల్ లోన్ వైపు మొగ్గు చూపుతుంటారు. అయితే, రుణం మంజూరు చేసే ముందు బ్యాంకులు కేవలం మీ జీతాన్ని మాత్రమే కాకుండా, మీ ఉద్యోగ స్థిరత్వాన్ని కూడా ప్రధానంగా పరిగణనలోకి తీసుకుంటాయి. తరచూ ఉద్యోగాలు మారడం మీ రుణ అర్హతపై ఎలాంటి ప్రభావం చూపుతుందో ఇక్కడ చూడండి. మీరు కొత్త ఉద్యోగంలో చేరినప్పుడు, ఆ వాతావరణానికి మీరు అలవాటు పడటానికి పట్టే సమయాన్ని బ్యాంకులు “సర్దుబాటు కాలం”గా భావిస్తాయి. మీ ఉద్యోగం అక్కడ ఎంతవరకు స్థిరంగా ఉంటుందో తెలిసే వరకు బ్యాంకులు వేచి చూస్తాయి. ఐటీ రంగం వంటి వాటిలో ఉద్యోగ మార్పులు సహజం కాబట్టి బ్యాంకులు కొంత మినహాయింపు ఇస్తాయి. కానీ, ఒక పెద్ద ఎంఎన్సీ (MNC) నుండి చిన్న స్టార్టప్కు మారినప్పుడు, అక్కడ ఉద్యోగ భద్రత తక్కువగా ఉంటుందని భావించి రుణం ఇవ్వడానికి వెనకాడవచ్చు. మీరు కొత్త ఉద్యోగంలో ప్రొబేషన్ పీరియడ్లో ఉంటే, ఆ కాలాన్ని బ్యాంకులు ‘అనిశ్చితి’గా భావిస్తాయి. అటువంటి సమయంలో లోన్ దరఖాస్తులు తిరస్కరణకు గురయ్యే అవకాశం ఎక్కువ. తక్కువ కాలంలోనే ఎక్కువ కంపెనీలు మారడం మీ ఆర్థిక క్రమశిక్షణపై అనుమానాలను కలిగిస్తుంది. రుణం సులభంగా దొరకాలంటే ఉద్యోగం మారిన వెంటనే లోన్ కోసం దరఖాస్తు చేయకండి. కనీసం 6 నెలల పాటు కొత్త కంపెనీలో కొనసాగిన తర్వాతే అప్లై చేయడం ఉత్తమం. మీ ఉద్యోగంలో మార్పులు ఉన్నా, మీ క్రెడిట్ స్కోరు బలంగా ఉంటే బ్యాంకులు సానుకూలంగా స్పందించే అవకాశం ఉంటుంది. మీరు మారిన కొత్త కంపెనీ ప్రభుత్వ సంస్థ లేదా పేరున్న మల్టీ నేషనల్ కంపెనీ అయితే మీ రుణ అర్హత మెరుగుపడుతుంది. పాత అప్పులు, క్రెడిట్ కార్డ్ బిల్లులను సకాలంలో చెల్లిస్తున్న రికార్డును మెయింటెన్ చేయండి. కాబట్టి, పర్సనల్ లోన్ ప్లాన్ చేసుకునే వారు కనీసం ఏడాది పాటు ఒకే సంస్థలో స్థిరంగా ఉండటం మేలు.
