పిన్నెల్లి బ్రదర్స్ కు బిగ్ షాక్..!

పల్నాడు జంట హత్యల కేసులో వైసీపీ నేతలు పిన్నెల్లి రామకృష్ణారెడ్డి, పిన్నెల్లి వెంకట్రామిరెడ్డికి సుప్రీంకోర్టు భారీ ఎదురుదెబ్బ ఇచ్చింది. గతంలో వీరికి ఇచ్చిన మధ్యంతర బెయిల్‌ను రద్దు చేస్తూ, ముందస్తు బెయిల్‌కు అర్హులు కారని స్పష్టం చేసింది. జస్టిస్ విక్రమ్‌నాథ్, జస్టిస్ సందీప్ మెహతా ధర్మాసనం ఈరోజు ఇచ్చిన తీర్పులో పిన్నెల్లి సోదరులు దాఖలు చేసిన రెండు పిటిషన్లను కొట్టివేసింది. విచారణలో సహకరించకపోవడం, సాక్షులను బెదిరించడం, సాక్ష్యాలను ట్యాంపర్ చేయడానికి ప్రయత్నించడం వంటి అంశాలను రాష్ట్ర ప్రభుత్వం కోర్టు దృష్టికి తీసుకురావడంతో, కస్టోడియల్ దర్యాప్తు అవసరమని కోర్టు పేర్కొంది. వీరిని అరెస్ట్ చేయడానికి అదనపు అనుమతులు అవసరం లేదని ధర్మాసనం చెప్పింది. లొంగిపోవడానికి రెండు వారాల సమయం ఇవ్వాలన్న నిందితుల తరఫు అభ్యర్థనను కూడా సుప్రీంకోర్టు తిరస్కరించింది. ముందస్తు బెయిల్ విషయంలో సమయం అనేది అన్వయించదని జస్టిస్ సందీప్ మెహతా వ్యాఖ్యానించారు. సెక్షన్ 161 కింద నమోదైన డాక్యుమెంట్లు నిందితుల చేతికి ఎలా చేరాయన్న అంశంపై కూడా కోర్టు రాష్ట్ర ప్రభుత్వాన్ని ప్రశ్నించింది. గుండ్లపాడు వద్ద ఇద్దరు టీడీపీ కార్యకర్తల హత్యకు సంబంధించి మే 25న పిన్నెల్లి సోదరులపై కేసు నమోదు చేయడంతో, రామకృష్ణారెడ్డిని ఏ6గా, వెంకట్రామిరెడ్డిని ఏ7గా పేర్కొన్నారు. ఈ కేసులో ముందస్తు బెయిల్ కోరుతూ సుప్రీంకోర్టును ఆశ్రయించి కొంతకాలం ఊరట పొందిన వీరికి, షరతులు ఉల్లంఘించినట్లు ప్రభుత్వం నిరూపించడంతో ఇరోజు ఆ బెయిల్ రద్దయింది. తీర్పుతో పిన్నెల్లి సోదరుల అరెస్ట్‌కు మార్గం సుగమమవగా, కేసు దర్యాప్తు మరింత వేగవంతం కానుందనేది న్యాయవర్గాల అభిప్రాయం.