కేసీఆర్ చేతుల్లోనే తెలంగాణ భవిష్యత్తు
తెలంగాణ రాష్ట్ర ఉజ్వల భవిష్యత్తు , అభివృద్ధి కేవలం కేసీఆర్ నాయకత్వంలోనే సాధ్యమని బీఆర్ఎస్ రాష్ట్ర ప్రధాన కార్యదర్శి టి.జీవన్ రెడ్డి స్పష్టం చేశారు. జగిత్యాలలో మీడియాతో గురువారం ఆయన మాట్లాడుతూ , ప్రస్తుత రేవంత్ రెడ్డి ప్రభుత్వం అనుసరిస్తున్న ప్రజా వ్యతిరేక విధానాల వల్ల రాష్ట్రంలో బలహీన వర్గాలు విద్యకు దూరమవుతున్నారని ఆవేదన వ్యక్తం చేశారు. ముఖ్యమంత్రి రేవంత్ రెడ్డి కేవలం రాజకీయ కక్షలతోనే కాలం గడుపుతున్నారని, ఆయన కలలో కూడా కేసీఆర్ వస్తున్నారనే భయంతో అభివృద్ధిని విస్మరిస్తున్నారని ఎద్దేవా చేశారు.
కాళేశ్వరం ప్రాజెక్టు విషయంలో తెలంగాణ హైకోర్టు ఇచ్చిన తీర్పు రేవంత్ ప్రభుత్వానికి ఒక గుణపాఠమని జీవన్ రెడ్డి పేర్కొన్నారు. ఇప్పటికైనా రాజకీయ వైషమ్యాలు పక్కన పెట్టి, ప్రజల ప్రయోజనాల దృష్ట్యా మేడిగడ్డను వెంటనే వినియోగంలోకి తీసుకురావాలని డిమాండ్ చేశారు. ఇదే సమయంలో మాజీ మంత్రి కేటీఆర్ పనితీరును ఆయన కొనియాడారు. సిరిసిల్ల నియోజకవర్గాన్ని రాష్ట్రంలోనే అగ్రగామిగా నిలిపేందుకు కేటీఆర్ చేసిన కృషి మరువలేనిదని, విద్య, వైద్య రంగాల్లో ఆయన చేసిన పోరాటమే మళ్లీ తెలంగాణను పురోగతి పథంలో నడిపిస్తుందని ధీమా వ్యక్తం చేశారు.
