గోషామహల్‌లో అర్ధరాత్రి నాలా రోడ్డు భూమిలోకి వెళ్లిన తీరు…
హైదరాబాద్‌‌లోని గోషామహల్‌లోని చాక్నావాడి ప్రాంతంలో నాలా రోడ్డు భూమిలోకి కూరుకుపోయింది. దారుస్సలామ్‌ నుండి చాక్నావాడికి వెళ్లే రోడ్డు మార్గంలో ఫ్లైవుడ్‌ దుకాణం ముందు ఈ సంఘటన చోటు చేసుకుంది. స్థానికులు తెలిపిన వివరాల ప్రకారం బుధవారం తెల్లవారు జామున సుమారు 2 గంటల ప్రాంతంలో ఈ ఘటన చోటు చేసుకున్నట్లు తెలిసింది. ఆ సమయంలో రాకపోకలు లేకపోవడంతోనే పెద్ద ప్రమాదం నుండి ప్రజలు బయటపడ్డారు. పురాతమైన నాలా కావడంతో కుంగినట్లు స్థానికులు చెబుతున్నారు. అయినా జీహెచ్‌ఎంసి వారు ఎప్పటికప్పుడు తనిఖీలు చేయకుండా నిద్రాణావస్థలో ఉండడం కూడా కారణం. గతంలోను ఇక్కడికి 200 మీటర్ల దూరంలో ఇదే నాలా కుంగినప్పుడు కూడా తగిన జాగ్రత్తలు జీహెచ్‌ఎంసి వారు తీసుకోలేదు. దాని మూలంగా దారిన పోయే ప్రజలు పలువురు గాయపడ్డారు. నాలాపై రోడ్డు కుంగడంతో వాహనాల రాకపోకలకు అంతరాయం ఏర్పడింది. సమాచారం అందుకున్న అధికారులు సంఘటనాస్థలానికి చేరుకొని ట్రాఫిక్‌ను క్లియర్‌ చేశారు. పూర్తి వివరాలు ఇంకా తెలియాల్సి ఉంది.
