శరద్ పవార్‌కు పిస్తోల్‌తో చంపేస్తామని ఫోన్‌పై బెదిరింపులు
నేషనలిస్ట్‌ కాంగ్రెస్ పార్టీ అధ్యక్షుడు శరద్ పవార్ నివాసానికి గుర్తు తెలియని వ్యక్తి ఫోన్ చేసి చంపేస్తానని బెదిరించాడు. ఫోన్ చేసిన వ్యక్తి… ముంబైకి వచ్చి కంట్రీ మేడ్ పిస్తోల్‌తో కాల్చివేస్తానని హిందీలో బెదిరించాడు. “ముంబై ఆవుంగా ఔర్ దేశీ పిస్టల్ సే గోలీ మార్ దుంగా” అని చెప్పాడు. దీంతో ఎన్సీపీ నేత భద్రతా బృందం అలర్ట్‌ అయింది. గామ్దేవి పోలీస్ స్టేషన్లో ఫిర్యాదు చేసింది. పోలీసులు కేసు నమోదు చేసుకుని దర్యాప్తు చేస్తున్నారు. గుర్తు తెలియని వ్యక్తిపై ఐపీసీ సెక్షన్ 294, 506(2) కింద కేసు నమోదు చేశారు. పవార్ నివాసానికి క్రమం తప్పకుండా కాల్ చేసి ఇలాంటి బెదిరింపులు చేస్తున్నారని, ఫోన్ చేసిన వ్యక్తి మానసికంగా అస్థిరంగా ఉన్నట్లు కనిపిస్తోందని ఎన్సీపీ ప్రధాన ప్రతినిధి మహేష్ తపసే తెలిపారు.
గతంలో కూడా శరద్ పవార్ కు ఇలాంటి బెదిరింపులు వచ్చాయి. ఏప్రిల్ లో మహారాష్ట్ర స్టేట్ రోడ్ ట్రాన్స్ పోర్ట్ కార్పొరేషన్ ఉద్యోగులు సమ్మెలో ఉన్న ఆయన ఇంటిపై దాడి చేశారు. ఇదిలా ఉండగా, శివాజీ మహారాజ్ పై మహారాష్ట్ర గవర్నర్ భగత్ సింగ్ కోశ్యారి చేసిన వ్యాఖ్యలకు నిరసనగా ఈ రోజు మహారాష్ట్రలో బంద్‌కు పిలుపునిచ్చారు. దీనితో పాటు ఈ వారంలో గవర్నర్ కు వ్యతిరేకంగా మోర్చా చేపట్టే యోచనలో ఉన్నారు. మహారాష్ట్ర రాజకీయ పార్టీలు.. రాష్ట్రపతి ద్రౌపది ముర్మును పదవి నుండి తొలగించాలని కేంద్ర ప్రభుత్వాన్ని డిమాండ్ చేశాయి. ఈ మేరకు కేంద్ర హోంమంత్రి అమిత్ షాకు లేఖ రాశారు.
