భారత రాయబారి నియాకమంపై అమెరికా సెనేట్‌లో కీలక ఓటింగ్
భారతదేశానికి రాయబారిగా అధ్యక్షుడు జో బైడెన్ ఎంపిక చేసిన ఎరిక్ గార్సెట్టి ఆ పదవిని చేపట్టవచ్చా లేదా అనే దానిపై అమెరికా సెనేట్ విదేశీ వ్యవహారాల కమిటీ నేడు ఓటు వేయనుంది. కొంతమంది సిబ్బందిపై లైంగిక దుష్ప్రవర్తన ఆరోపణల కారణంగా లాస్ ఏంజిల్స్ మాజీ మేయర్ గార్సెట్టిని కీలక రాయబారి పదవికి నియమించడం నిలిచిపోయింది. ప్రతిష్టంభన కారణంగా, రెండేళ్లుగా అమెరికాకు భారత రాయబారి లేరు. కీలకమైన పోస్టు ఖాళీగా ఉండటంతో, గత ఏడాది బైడెన్ ప్రభుత్వం… ఢిల్లీలోని తన ఎంబసీలో తాత్కాలిక ఛార్జ్ డి ఎఫైర్స్‌గా ఎలిజబెత్ జోన్స్‌ను నియమించింది.
గార్సెట్టి 52, జూలై 2021లో భారతదేశానికి అంబాసిడర్ పదవికి అధ్యక్షుడు బైడెన్ నామినేట్ చేశాడు. కానీ పాలక డెమొక్రాట్‌లకు ఆయనను ఎంపిక చేయడానికి తగినంత మద్దతు లేనందున నామినేషన్ ఓటు కోసం సెనేట్‌కు తీసుకురాలేదు. గార్సెట్టి, లాస్ ఏంజెల్స్ మేయర్ కార్యాలయంలోని కొంతమంది సిబ్బందిపై లైంగిక దుష్ప్రవర్తన ఆరోపణలతో కొందరు రిపబ్లికన్ సభ్యులు నామినేషన్‌ను వ్యతిరేకించారు. గత ఏడాది ఆయన నియామకంపై ఆమోదం లభించినా… కాంగ్రెస్‌ ధృవీకరించలేదు.
బైడెన్ ఈ జనవరిలో గార్సెట్టిని తిరిగి నామినేట్ చేశాడు. సెనేట్ ఫారిన్ రిలేషన్స్ కమిటీ ఓటింగ్ షెడ్యూల్ చేయబడింది. అయితే రిపబ్లికన్ సెనేటర్ మార్కో రూబియో హోల్డ్ చేయడంతో అది నేటికి వాయిదా పడింది. “ఈ నామినీలలో ఒకరు తాను గతంలో పనిచేసిన సమయంలో లైంగిక వేధింపుల ఆరోపణలను విస్మరించారు. ఈ అసంబద్ధమైన నామినేషన్ల పట్ల నేను కళ్లు మూసుకోను. ఇది అమెరికా క్షీణతను వేగవంతం చేస్తుంది” అని రూబియో వార్తా సంస్థ PTIతో చెప్పారు. ఈరోజు ఓటింగ్‌కు ముందు, రిపబ్లికన్ సెనేటర్ చక్ గ్రాస్లీ, గతసారి గార్సెట్టి నామినేషన్‌ను అడ్డుకోవడంలో కీలక పాత్ర పోషించారు. వ్యతిరేకంగా ఓటు వేయాలని సెనేట్ కమిటీ సభ్యులను కోరారు. మేయర్ కార్యాలయంలోని సిబ్బంది లైంగిక దుష్ప్రవర్తనకు పాల్పడినట్లు ఆరోపించిన కేసుల్లో గార్సెట్టి స్పష్టమైన ఆధారాలు లభించాయని చెప్పారు.