గోవాలో కాంగ్రెస్‌కు ఝలక్… 11లో మిగిలింది ముగ్గురే..!
గోవాలో కాంగ్రెస్ పార్టీకి గట్టి ఎదురుదెబ్బ తగిలింది. ఆ పార్టీ నుంచి గత ఎన్నికల్లో గెలిచిన 11 మంది ఎమ్మెల్యేల్లో 8 మంది బీజేపీ గూటికి చేరారు. ఓవైపు రాహుల్ గాంధీ భారత్ జోడో యాత్ర చేస్తుంటే బీజేపీ మాత్రం కాంగ్రెస్ ముక్త్ భారత్ చేసేస్తోంది. కాంగ్రెస్ పార్టీని కాపాడెదెవరన్న ప్రశ్న ఉదయిస్తోంది. గోవా అసెంబ్లీ ఎన్నికల తర్వాత కాంగ్రెస్ పార్టీలో కల్లోలం తుపాను తీరం దాటినట్టుగానే కన్పిస్తోంది. ఆ పార్టీ నుంచి అసెంబ్లీకి ఎన్నికైన 11 మంది ఎమ్మెల్యేల్లో 8 మంది ఎమ్మెల్యేలు ఇవాళ బీజేపీలో చేరారు. పార్టీ సీనియర్ నేతలు దిగంబర్ కామత్, మైఖేల్ లోబో నేతృత్వంలోని 11 మంది ఎమ్మెల్యేలలో ఎనిమిది మంది బీజేపీ తీర్థం పుచ్చుకున్నారు. ప్రస్తుతం అసెంబ్లీలో కాంగ్రెస్ బలం మూడు సభ్యులు మాత్రమే. రాహుల్ గాంధీ భారత్ జోడో యాత్ర నేపథ్యంలో గోవా పరిణామాలు ఆ పార్టీని కలవరపెడుతున్నాయ్. భారత్ జోడా కాకుండా..కాంగ్రెస్ పార్టీని జోడో (ఐక్యం) చేయాలంటూ బీజేపీ ఆక్షేపిస్తోంది.
తాజా చేరికపై కాంగ్రెస్ నేత మైఖెల్ లోబో రియాక్ట్ అయ్యారు. ఇది కాంగ్రెస్ చోడో అని… బీజేపీ కో జోడో అంటూ చమత్కరించారు. ఎనిమిది మంది ఎమ్మెల్యేలు ఒక గ్రూపుగా విడిపోవడంతో పార్టీ బలంలో మూడింట రెండు వంతులు ఉండటంతో… ఎమ్మెల్యేలు ఫిరాయింపుల నిరోధక చట్టం ప్రకారం అనర్హత వేటును అడ్డుకునేందుకు అవకాశం ఉంటుంది. కాంగ్రెస్ ఎమ్మెల్యేల ఫిరాయింపుపై గోవాలో కాంగ్రెస్ మిత్రపక్షంగా ఉన్న గోవా ఫార్వర్డ్ పార్టీ చీఫ్ విజయ్ సర్దేశాయ్ తీవ్ర వ్యాఖ్యలు చేశారు. ఫిరాయించిన ఎమ్మెల్యేలు “సంపద కోసం అత్యాశ, అధికారం కోసం ఆకలితో.. సర్వశక్తిమంతుడైన దేవుడిని ధిక్కరిస్తూన్నారంటూ మండిపడ్డారు. కాంగ్రెస్ పార్టీ నుంచి గెలిచిన ఎమ్మెల్యేలు బీజేపీలో చేరడం ఒక చెడు సంప్రదాయన్నారు. గత జులైలో దిగంబర్ కామత్, మైఖేల్ లోబో కాంగ్రెస్ పార్టీ నుంచి బీజేపీలో చేరతారన్న చర్చ సాగింది. అదే సమయంలో ఫిరాయింపుల నిరోధక చట్టం కింద వారిని అనర్హులుగా ప్రకటించాలని కాంగ్రెస్ నాడు స్పీకర్‌ను కోరింది. పార్టీ ప్రతిపక్ష నాయకుడిగా మైఖేల్ లోబోను తొలగించింది, కానీ కొత్తగా ఎవరిని నియమించలేదు.
ఈ ఉదయం అసెంబ్లీ సమావేశాలు జరుగుతున్నందున స్పీకర్‌తో ఎమ్మెల్యేల సమావేశం ఊహాగానాలకు తెరలేపింది. ఎనిమిది మంది కాంగ్రెస్ ఎమ్మెల్యేలు బీజేపీలో చేరుతున్నట్లు రాష్ట్ర బీజేపీ చీఫ్ సదానంద్ షెట్ తనవాడే పీటీఐకి తెలిపారు. ఐతే గత జూలైలో, మాజీ ముఖ్యమంత్రి కామత్ కాంగ్రెస్ పార్టీలో విభేదాలను ఖండించడం విశేషం. ఈ ఏడాది ప్రారంభంలో ఎన్నికలకు ముందు కాంగ్రెస్‌లో చేరడానికి ముందు బీజేపీలో ఉన్న మైఖేల్ లోబో కూడా పార్టీలో సమస్యను ప్రస్తావించకపోవడం విశేషం. 2019లో గోవా కాంగ్రెస్ ఇదే పద్ధతిలో చీలిపోయింది. అసెంబ్లీ బలంలో మూడింట రెండు వంతులు – 15 మంది ఎమ్మెల్యేలలో 10 మంది – బీజేపీలోకి ఫిరాయించారు, అందుకే ఈ సంవత్సరం పార్టీ తన అభ్యర్థులను రాహుల్ గాంధీ సమక్షంలో విధేయత ప్రతిజ్ఞ చేయించింది. అయినప్పటికీ, జూలైలో కాంగ్రెస్ కనీసం ఏడుగురు ఎమ్మెల్యేలను తన వద్ద ఉంచుకోగలిగినప్పటికీ, తాజా ఫిరాయింపును కాంగ్రెస్ పార్టీ ఊహించలేకపోయింది.
గోవా సంక్షోభాన్ని పరిష్కరించడానికి కాంగ్రెస్ అధినేత్రి సోనియా గాంధీ సీనియర్ నాయకుడు ముకుల్ వాస్నిక్‌ను నియమించినా ఫలితం లేకుండా పోయింది. గోవా అసెంబ్లీలో, బీజేపీకి 40 మంది – 20 మంది ఎమ్మెల్యేలు, మహారాష్ట్రవాది గోమంతక్ పార్టీకి చెందిన ఇద్దరు, ముగ్గురు స్వతంత్రులు ఉన్న సభలో 25 మెజారిటీ ఉంది. ఇది ఇప్పుడు 33కి చేరుకుంటుంది. కాంగ్రెస్‌కు ముగ్గురు సభ్యులు మిగులుతారు. గోవా ఫార్వర్డ్ పార్టీ నుండి ఒకరు ఉన్నారు. ఆమ్ ఆద్మీ పార్టీకి (ఆప్) ఇద్దరు ఎమ్మెల్యేలు, రివల్యూషనరీ గోన్స్ పార్టీకి ఒకరు ఉన్నారు.
