బీఆర్ఎస్ రజతోత్సవ వేడుకలకు కేటీఆర్ పిలుపు

భారత రాష్ట్ర సమితి (బీఆర్ఎస్) ఆవిర్భవించి 25 ఏళ్లు పూర్తి చేసుకుని, 26వ వసంతంలోకి అడుగుపెడుతున్న సందర్భంగా సోమవారం రాష్ట్రవ్యాప్తంగా రజతోత్సవ వేడుకలను ఘనంగా నిర్వహించాలని పార్టీ వర్కింగ్ ప్రెసిడెంట్ కేటీఆర్ పిలుపునిచ్చారు. ఆదివారం పార్టీ నేతలతో నిర్వహించిన టెలీకాన్ఫరెన్స్‌లో ఆయన మాట్లాడుతూ.. ప్రతి గ్రామం, పట్టణం, నియోజకవర్గ కేంద్రాల్లో గులాబీ జెండాలను ఆవిష్కరించి జెండా వందనం చేయాలని శ్రేణులకు సూచించారు. పాతికేళ్ల ప్రస్థానంలో ఎన్నో చారిత్రాత్మక విజయాలు సాధించిన పార్టీకి ఈ ఆవిర్భావ దినోత్సవం ఎంతో కీలకమని ఆయన పేర్కొన్నారు.ఈ సందర్భంగా సోమవారం మధ్యాహ్నం 2 గంటలకు హైదరాబాద్‌లోని తెలంగాణ భవన్‌లో కేసీఆర్ అధ్యక్షతన రాష్ట్ర స్థాయి ప్రతినిధుల సమావేశం నిర్వహించనున్నారు. సాధారణంగా నిర్వహించే ప్లీనరీకి బదులుగా, ఎండల తీవ్రత దృష్ట్యా కేవలం ఆహ్వానం ఉన్న ముఖ్య నేతలతోనే ఈ సమావేశం జరగనుంది. రాష్ట్ర కార్యవర్గ సభ్యులు, ఎంపీలు, ఎమ్మెల్యేలు, ఎమ్మెల్సీలు, జిల్లా అధ్యక్షులు మాత్రమే దీనికి హాజరుకావాలని, మిగిలిన నాయకులు తమ నియోజకవర్గాల్లోనే ఉండి వేడుకలను పర్యవేక్షించాలని కేటీఆర్ స్పష్టం చేశారు. ఈ కీలక సమావేశంలో పార్టీ సంస్థాగత నిర్మాణం, భవిష్యత్తు రాజకీయ వ్యూహాలపై కేసీఆర్ దిశానిర్దేశం చేయనున్నారు. 2001లో ఉద్యమ పార్టీగా ప్రస్థానం మొదలుపెట్టి, ప్రత్యేక రాష్ట్రాన్ని సాధించి, పదేళ్లపాటు పాలించిన బీఆర్ఎస్.. ప్రస్తుతం ఎదురైన ఎన్నికల సవాళ్ల నుంచి కోలుకుని తిరిగి పుంజుకునే దిశగా అడుగులు వేస్తోంది. పార్టీ రజతోత్సవ వేళ నిర్వహిస్తున్న ఈ సమావేశం గులాబీ కేడర్‌లో నూతనోత్సాహాన్ని నింపుతుందని నేతలు భావిస్తున్నారు.