పంటను దళారులకు అమ్మి మోసపోవద్దు

వనపర్తి జిల్లా చిన్నంబావి మండల కేంద్రంలో మార్క్ ఫెడ్ ఆధ్వర్యంలో ఏర్పాటు చేసిన మొక్కజొన్న కొనుగోలు కేంద్రాన్ని రాష్ట్ర ఎక్సైజ్, పర్యాటక శాఖ మంత్రి జూపల్లి కృష్ణారావు ప్రారంభించారు. ఈ సందర్భంగా ఆయన మాట్లాడుతూ, రైతులు తాము పండించిన పంటను దళారులకు అమ్మి మోసపోవద్దని, ప్రభుత్వం ఏర్పాటు చేసిన కేంద్రాల్లోనే విక్రయించాలని సూచించారు. క్వింటాల్ మొక్కజొన్నకు ప్రభుత్వం రూ. 2,400 మద్దతు ధర నిర్ణయించిందని, రైతులు పండించిన చివరి గింజ వరకు ప్రభుత్వమే కొనుగోలు చేస్తుందని హామీ ఇచ్చారు. రైతుల అభివృద్ధి కోసం ప్రభుత్వం అనేక సంక్షేమ పథకాలను అమలు చేస్తోందని, వీటిని చూసి ఓర్వలేకనే ప్రతిపక్షాలు అసత్య ప్రచారాలకు పాల్పడుతున్నాయని మంత్రి మండిపడ్డారు. కొనుగోలు ప్రక్రియలో రైతులకు ఎలాంటి ఇబ్బందులు కలగకుండా, అవకతవకలకు తావులేకుండా జాగ్రత్తలు తీసుకోవాలని అధికారులను ఆదేశించారు. క్షేత్రస్థాయిలో పారదర్శకత పాటిస్తూ రైతులకు సకాలంలో చెల్లింపులు జరిగేలా చూడాలని స్పష్టం చేశారు. ఈ కార్యక్రమంలో కాంగ్రెస్ పార్టీ సీనియర్ నాయకులు కొత్త కళ్యాణ్ రావు, కృష్ణ ప్రసాద్ యాదవ్, మార్క్ ఫెడ్ అధికారులు, వివిధ గ్రామాల ప్రజాప్రతినిధులు పాల్గొన్నారు. ప్రభుత్వ కొనుగోలు కేంద్రాల వల్ల రైతులకు గిట్టుబాటు ధర లభిస్తుందని, దళారీల దోపిడీకి అడ్డుకట్ట పడుతుందని ఈ సందర్భంగా నాయకులు ఆశాభావం వ్యక్తం చేశారు.