టాటానగర్ ఎక్స్ప్రెస్కు తప్పిన ప్రమాదం
పెందుర్తి:విశాఖపట్నం నగరానికి సమీపంలోని పెందుర్తి రైల్వే స్టేషన్ వద్ద బుధవారం ఉదయం పెద్ద ప్రమాదం తప్పింది. టాటానగర్ ఎక్స్ప్రెస్ రైలు అదే మార్గంలో వేగంగా వస్తుండగా, సమీపంలో జరుగుతున్న విద్యుత్ లైన్ పనులు ప్రమాదకర పరిస్థితిని సృష్టించాయి.
పెందుర్తి స్టేషన్ పరిసరాల్లో విద్యుత్ లైన్ బలోపేతం పనులు కొనసాగుతున్నాయి. ఈ క్రమంలో ఒక విద్యుత్ స్తంభం బలహీనంగా మారి పక్కకు ఒరిగిపోయింది. అదే సమయంలో ట్రాక్మీదుగా టాటానగర్ ఎక్స్ప్రెస్ రైలు చేరుకుంది.స్తంభం విద్యుత్ వైర్లపై వంగిపడటంతో పరిస్థితి మరింత ప్రమాదకరంగా మారింది. అయితే, ఈ దృశ్యాన్ని లోకో పైలట్ సమయానికి గమనించి అత్యవసర బ్రేకులు వేశాడు. దీంతో రైలు కేవలం కొన్ని మీటర్ల దూరంలోనే ఆగిపోయింది. పైలట్ అప్రమత్తతతో పెద్ద ప్రాణనష్టం తప్పింది.
విద్యుత్ స్తంభం కొట్టుకొని కిందపడిన క్రమంలో ముగ్గురు కార్మికులు గాయపడ్డారు. వారిని వెంటనే సమీపంలోని ఆస్పత్రికి తరలించారు. అందులో ఒకరి పరిస్థితి విషమంగా ఉంది .
ఈ ఘటనతో పెందుర్తి రైల్వే మార్గంలో సుమారు గంటపాటు రైళ్ల రాకపోకలు నిలిచిపోయాయి. అత్యవసరంగా రైల్వే అధికారులు, సాంకేతిక నిపుణులు సంఘటన స్థలానికి చేరుకుని మరమ్మతుల పనులు చేపట్టారు. స్తంభం, విద్యుత్ లైన్ను పునరుద్ధరించడంతో రైళ్ల రాకపోకలు మళ్లీ సాధారణ స్థితికి వచ్చాయి.
విద్యుత్ లైన్ పనులు జరుగుతున్న ప్రాంతంలో రైళ్ల నడకను నియంత్రించాలి కానీ పర్యవేక్షణ లోపం వల్ల ప్రమాదం దాదాపుగా చోటుచేసుకునే పరిస్థితి వచ్చింది. సంఘటనపై రైల్వే అధికారులు విచారణకు ఆదేశించినట్లు సమాచారం.
లోకో పైలట్ చురుకుదనం, వేగవంతమైన నిర్ణయం వల్లే ఈ ప్రమాదం భారీ విపత్తుగా మారకుండా తప్పించబడిందని అధికారులు గుర్తించారు.
