‘S.I.R ‘కు సుప్రీం గ్రీన్ సిగ్నల్
కేంద్ర ఎన్నికల సంఘం దేశవ్యాప్తంగా ఓటర్ల జాబితాను మరింత శుద్ధి చేసేందుకు చేపట్టిన ప్రత్యేక సమగ్ర సవరణ (SIR)పై సుప్రీంకోర్టు బుధవారం కీలక తీర్పు ఇచ్చింది. ఎస్ఐఆర్ ప్రక్రియను నిలిపివేయాల్సిన అవసరం లేదని సుప్రీంకోర్టు స్పష్టం చేసింది. ఈ ప్రక్రియను ఆపాలని కోరుతూ డీఎంకే నేత ఆర్‌.ఎస్‌. బర్దీ , ఎన్‌జిఒ అసోసియేషన్ ఫర్ డెమాక్రటిక్ రిఫార్మ్స్ తరఫున ప్రశాంత్ భూషణ్ దాఖలు చేసిన పిటిషన్లను జస్టిస్ సూర్యకాంత్ నేతృత్వంలోని బెంచ్ విచారించింది.తాజా విచారణలో ఎస్ఐఆర్ ప్రక్రియను నిలిపివేయాల్సిన అవసరం లేదని సుప్రీంకోర్టు పేర్కొంది. ఇప్పటికే కొన్ని రాష్ట్రాల్లో ఈ ప్రక్రియ కొనసాగుతుండటంతో మధ్యలో ఆపడం సాధ్యం కాదని పేర్కొంది. పిటిషనర్లు చేసిన “పెద్ద ఎత్తున పేర్లు తొలగించబడతాయి” అనే వాదనను కోర్టు తోసిపుచ్చింది. ఇది కేవలం డ్రాఫ్ట్ జాబితా మాత్రమేనని, ఏవైనా లోపాలు ఉన్నట్లయితే మొత్తం ప్రక్రియను రద్దు చేసే అధికారమూ కోర్టుకే ఉందని వెల్లడించింది. పిటిషనర్లు ఎస్ఐఆర్ ఎన్నికల చట్టాలకు విరుద్ధమని, పెద్ద ఎత్తున ఓటర్ల పేర్లు తొలగించే ప్రమాదం ఉందని వాదించారు. అయితే డీఎంకే తరఫున వాదించిన కపిల్ సిబల్, “ప్రక్రియ సరిగా నడవాలి కానీ పూర్తిగా ఆపాల్సిన అవసరం లేదు” అని పేర్కొన్నారు. ఇదే సమయంలో కేంద్ర ఎన్నికల సంఘం న్యాయవాదులు, పలు రాష్ట్ర హైకోర్టుల్లో ఇదే అంశంపై విచారణలు కొనసాగుతున్నట్లు కోర్టు దృష్టికి తీసుకువచ్చారు.దీనిపై స్పందించిన సుప్రీంకోర్టు, దేశంలోని అన్ని హైకోర్టులు ఎస్ఐఆర్ కు సంబంధించిన విచారణలను తాత్కాలికంగా నిలిపివేయాలని ఆదేశించింది. అలాగే ఎన్నికల సంఘంపై ఉన్న ఆరు పిటిషన్లకు నోటీసులు జారీ చేసి, తదుపరి విచారణను నవంబర్ 26కు వాయిదా వేసింది. కేంద్ర ఎన్నికల సంఘం చేపట్టిన ఎస్ఐఆర్ దేశవ్యాప్తంగా జనవరి 2025 ఓటర్ల జాబితాను ఆధారంగా తీసుకుని, ఆధార్, EPIC వంటి పత్రాల ఆధారంగా కొత్త ఓటర్లను చేర్చడం, తప్పులున్న వివరాలను సరిచేయడం, పాత పేర్లను నవీకరించడం వంటి చర్యలు చేపడుతుంది. పెద్ద ఎత్తున పేర్లు తొలగించడం లక్ష్యం కాదు, నిజమైన అర్హులైన ఓటర్లకు అవకాశం కల్పించడమే ప్రధాన ఉద్దేశమని కోర్టు స్పష్టం చేసింది. బీహార్, కేరళ వంటి రాష్ట్రాల్లో ఓటర్లు ఇబ్బంది పడకుండా తగిన జాగ్రత్తలు తీసుకోవాలని కేంద్ర ఎన్నికల సంఘానికి ఆదేశించింది.
