Spl Story: మోదీ వంద రోజుల పాలన స్టాక్ మార్కెట్లో రచ్చ రచ్చ
ప్రధాని నరేంద్ర మోదీ మూడోసారి అధికారంలోకి వచ్చిన మొదటి 100 రోజుల్లో స్టాక్ మార్కెట్లు దూసుకుపోతున్నాయి. కేంద్రంలోని ఎన్డీయే ప్రభుత్వం సెప్టెంబర్ 17వ తేదీ మంగళవారంతో 100 రోజులు పూర్తి చేసుకుంది. మోడీ 3.0 మొదటి 100 రోజులలో బెంచ్మార్క్ సూచీలు గణనీయమైన జంప్లను చూశాయి. క్యాపిటల్ గెయిన్స్ టాక్స్ పెంపు, లోక్సభ ఎన్నికలలో BJP ఊహించిన విధంగా భారీ మెజారిటీతో గెలవకపోయినా, సెన్సెక్స్, నిఫ్టీ రెండూ మోడీ 3.0 100 రోజులలో రికార్డు స్థాయిల్లో దూసుకుపోతున్నాయి.
నరేంద్ర మోదీ మూడోసారి ప్రధానిగా ప్రమాణ స్వీకారం చేసిన జూన్ 9 నుంచి సెప్టెంబర్ 18న ముగిసే సమయానికి 30 షేర్ల BSE సెన్సెక్స్ దాదాపు 6,500 పాయింట్లు ఎగబాకి 82,948.23కి చేరుకుంది. ఇది 8.4% కంటే ఎక్కువ పెరుగుదలను సూచిస్తుంది. అదే సమయంలో, నిఫ్టీ 50, దాదాపు 2087 పాయింట్లు లేదా 9% పెరిగి 25,377.55 పాయింట్లకు చేరుకుంది. సెప్టెంబరు 17న రికార్డు గరిష్టాల వద్ద ముగిసిన తర్వాత, ప్రభుత్వం మోదీ 3.0 100 రోజుల సెలబ్రషన్స్ జరుపుకుంటున్నప్పుడు, సెప్టెంబర్ 18న రెండు సూచీలు స్వల్పంగా తగ్గాయి. మరోవైపు, పలు రంగాలు మెరుగైన పనితీరు కనబరిచాయి.
జూన్ 10- సెప్టెంబర్ 18 మధ్య నిఫ్టీ IT ఇండెక్స్ 8% కంటే ఎక్కువ లాభపడగా, నిఫ్టీ హెల్త్కేర్ ఇండెక్స్ దాదాపు 17% లాభపడింది. ఈ కాలంలో ప్రభుత్వ విధానాల ప్రకటనల తర్వాత రక్షణ, EV, రియల్ ఎస్టేట్, ఇన్ఫ్రాస్ట్రక్చర్ స్టాక్లు కూడా పుంజుకున్నాయి. ఇటీవల, ప్రభుత్వం నూతన ఎలక్ట్రిక్ మొబిలిటీ విధానాన్ని ప్రకటించింది, ఇది EV స్టాక్ల పెరుగుదలపై ప్రభావం చూపించింది. ఈ సమయంలో BSE స్మాల్క్యాప్ ఇండెక్స్ కూడా 15% పైగా ఎగబాకింది. ఈ కాలంలో బిఎస్ఇ మిడ్క్యాప్ ఇండెక్స్ కూడా 10% జంప్ చేసింది.
మోదీ 3.0 మొదటి 100 రోజులలో స్టాక్ మార్కెట్ల పనితీరు 2019లో నరేంద్ర మోడీ ప్రభుత్వం రెండోసారి అధికారంలోకి వచ్చినప్పుడు దాని పనితీరుకు పూర్తి విరుద్ధంగా ఉంది. మోడీ 2.0 మొదటి 100 రోజులలో, సెన్సెక్స్ 2,800 పైగా పాయింట్లు క్షీణించింది. నిఫ్టీ 1,000 పాయింట్లు పతనమయ్యాయి. 2014లో ప్రధాని మోడీ మొదటి పదవీ కాలంలో కార్యాలయంలోని ప్రారంభ రోజులు స్టాక్ మార్కెట్ ర్యాలీ కొనసాగింది. మే 26 – సెప్టెంబర్ 3 మధ్య నిఫ్టీ సెన్సెక్స్ దాదాపు 11% లాభాలను నమోదు చేశాయి.
