పాక్ లో షియా..సున్నీల అంతర్యుద్ధం

పాకిస్తాన్ ప్రస్తుతం దేశ చరిత్రలోనే గడ్డు పరిస్ధితిని ఎదుర్కొంటోంది. ఒకవైపు సరిహద్దుల్లో ఆఫ్ఘనిస్తాన్‌తో నేరుగా యుద్ధం, మరోవైపు దేశం లోపల షియా-సున్నీ వర్గాల మధ్య తీవ్ర ఘర్షణలు, ఆర్థిక సంక్షోభం ఆ దేశాన్ని “అంతర్యుద్ధం” అంచుకు నెట్టేశాయి. ముఖ్యంగా పశ్చిమాసియాలో ఇరాన్ సుప్రీం లీడర్ ఖమేనీ మరణం పాకిస్తాన్‌లో మతపరమైన చిచ్చు రేపింది. ఇరాన్‌కు మద్దతుగా షియా వర్గాలు పెద్ద ఎత్తున నిరసనలు చేపడుతుండగా, వారిని అడ్డుకుంటున్న సున్నీ వర్గాల మధ్య దాడులు జరుగుతున్నాయి. అమెరికా ఎంబసీలు , కాన్సులేట్లపై జరిగిన దాడులను అదుపు చేసే క్రమంలో పోలీసులు జరిపిన కాల్పుల్లో ఇస్లామాబాద్, కరాచీ నగరాల్లో దాదాపు 40 మందికి పైగా మరణించారు. గిల్గిత్-బాల్టిస్తాన్ వంటి సున్నిత ప్రాంతాల్లో సైన్యం కర్ఫ్యూ విధించిందంటే పరిస్థితి ఎంత భయానకంగా ఉందో అర్థం చేసుకోవచ్చు.

సరిహద్దుల విషయానికి వస్తే, ఆఫ్ఘనిస్తాన్ తాలిబన్ ప్రభుత్వంతో పాక్ సంబంధాలు పూర్తిగా తెగిపోయాయి. డ్యూరాండ్ లైన్ వెంబడి పాక్ సైన్యం జరిపిన వైమానిక దాడులకు ప్రతిగా ఆఫ్ఘన్ దళాలు పాక్ సరిహద్దు పోస్టులను ధ్వంసం చేస్తున్నాయి. ఇది కేవలం సరిహద్దు ఘర్షణ మాత్రమే కాదని, ఒక పూర్తిస్థాయి యుద్ధమని పాక్ రక్షణ మంత్రే స్వయంగా ప్రకటించడం గమనార్హం. ఇటు లోపల బలూచిస్తాన్ లిబరేషన్ ఆర్మీ తన వేర్పాటువాద ఉద్యమాన్ని హింసాత్మకంగా మార్చింది. ప్రభుత్వ భవనాలు, సైనిక వాహనాలే లక్ష్యంగా బాంబుల వర్షం కురిపిస్తుండటంతో బలూచిస్తాన్ రావణకాష్ఠంలా మారింది. ముఖ్యంగా చైనా పెట్టుబడులతో నడుస్తున్న సీపీఈసీ ప్రాజెక్టుల భద్రత పాక్ సైన్యానికి పెద్ద సవాలుగా మారింది.

మాజీ ప్రధాని ఇమ్రాన్ ఖాన్ అరెస్ట్ తర్వాత పాక్ పంజాబ్ ప్రాంతం అట్టుడుకుతోంది. సైన్యంపై గతంలో ఉన్న గౌరవం పూర్తిగా నశించిందని, ప్రజలు నేరుగా సైనిక స్థావరాలపై దాడులు చేయడమే దీనికి నిదర్శనమని విశ్లేషకులు భావిస్తున్నారు. ఆర్థిక వ్యవస్థ విషయానికి వస్తే, పాకిస్తాన్ ప్రస్తుతం ‘వెంటిలేటర్’పై ఉన్న రోగిలా మారింది. నిత్యావసరాల ధరలు 40% పైగా పెరిగిపోవడం, పెట్రోల్ , విద్యుత్ బిల్లులు సామాన్యుడికి భారంగా మారడం వల్ల ప్రజలు వీధుల్లోకి వచ్చి నిరసనలు తెలుపుతున్నారు. రూపాయి విలువ కనిష్ట స్థాయికి పడిపోవడంతో విదేశీ మారక ద్రవ్య నిల్వలు అట్టడుగుకు చేరాయి, దీనివల్ల అనేక పరిశ్రమలు మూతపడి నిరుద్యోగం విపరీతంగా పెరిగింది.

ఒకవైపు మతపరమైన అల్లర్లు, మరోవైపు వేర్పాటువాద దాడులు, ఇంకోవైపు పొరుగు దేశంతో యుద్ధం , ఆర్థిక పతనం.. ఈ నాలుగింటి కలయిక పాకిస్తాన్‌ను విచ్ఛిన్నం దిశగా తీసుకెళ్తోంది. పాక్ ప్రభుత్వం తక్షణమే అంతర్జాతీయ సహకారం పొందకపోతే లేదా అంతర్గత విభేదాలను పరిష్కరించుకోకపోతే, ఆ దేశం ముక్కలయ్యే ప్రమాదం ఉందని అంతర్జాతీయ నిపుణులు హెచ్చరిస్తున్నారు. పాక్ ప్రజలు ఇప్పుడు తమ ప్రాణాలను అరచేతిలో పెట్టుకుని బతుకుతున్నారు.