ఢిల్లీ కార్ బ్లాస్ట్ దర్యాప్తులో కీలక మలుపు
ఢిల్లీ రెడ్‌ఫోర్ట్ సమీపంలో నవంబర్ 10న జరిగిన కార్ బ్లాస్ట్ కేసులో దర్యాప్తు సంస్థలు కీలక ఆధారాన్ని బయటకు తెచ్చాయి. ఆత్మాహుతి దాడికి కొద్దిసేపటి ముందే ఉగ్రవాది డాక్టర్ ఉమర్ ఉన్ నబీ రికార్డ్ చేసిన చివరి వీడియోను విచారణాధికారులు స్వాధీనం చేసుకున్నారు. ఈ వీడియోలో ఉమర్ ఆత్మాహుతి దాడిని ‘బలిదాన ఆపరేషన్’గా చూపించేందుకు ప్రయత్నించిన తీరు అతను తీవ్రవాద సిద్ధాంతాల ప్రభావంలో ఎంతగా ఉన్నాడో స్పష్టంగా వెల్లడిస్తోంది.
“ఆత్మాహుతి దాడిని సమాజం తప్పుగా అర్థం చేసుకుంది. ఇది అమరత్వం కోసం చేసే ఆపరేషన్” అని ఉమర్ వీడియోలో పేర్కొనడం గమనార్హం. ఈ వ్యాఖ్యలు అతని మైండ్‌సెట్‌ను, దాడి ముందు అతని మానసిక స్థితిని స్పష్టంగా తెలియజేస్తున్నాయని అధికారులు వివరించారు. వీడియో టైమ్‌స్టాంప్, అతని హావభావాలు పరిశీలించినప్పుడు — ఇది బ్లాస్ట్‌కు క్షణాల ముందే రికార్డ్ చేసినదని దర్యాప్తు సంస్థలు నిర్ధారించాయి.
ఉమర్ మొబైల్ డేటా, CCTV ఫుటేజ్, డిజిటల్ ట్రేసింగ్‌ ఆధారంగా అతని ప్రయాణ మార్గం, టెరర్ మాడ్యూల్ కార్యకలాపాలను ఏజెన్సీలు రీకన్స్ట్రక్ట్ చేస్తున్నాయి. పుల్వామాకు చెందిన 28 ఏళ్ల డాక్టర్ ఉమర్ వైట్ కాలర్ టెరర్ మాడ్యూల్‌లో కీలక బాధ్యతలు నిర్వహించినట్లు విచారణలో తెలిసింది. DNA పరీక్షల్లో కూడా పేలిన కార్ నడిపింది ఉమరేనని ధృవీకరించారు.
ఇక ఫరీదాబాద్‌లో దాడికి గంటల ముందే 2,900 కిలోల పేలుడు పదార్థాల స్వాధీనం, ముగ్గురు డాక్టర్ల అరెస్టులు కేసును మరింత కీలకంగా మలిచాయి. ఉమర్‌కు సేఫ్‌హౌస్, వాహనాలు, పేలుడు పదార్థాలు అందించిన జాసిర్ బిలాల్ వాణి, అమీర్ రషీద్ అలీ ఇప్పటికే అదుపులోకి తీసుకోబడ్డారు.
బ్లాస్ట్‌లో చికిత్స పొందుతున్న ఇద్దరు మరణించడంతో మొత్తం మరణాల సంఖ్య 15కు పెరిగింది.
