తిప్పతీగ గురించి మీకు తెలుసా..?
ప్రకృతిలో లభించే అనేక మొక్కలు మనకు చాలా మేలు చేస్తాయి. మన చుట్టూ ఉండే మొక్కల గురించి చాలా మందికి తెలియదు. అలాంటి మొక్కల్లో తిప్పతీగ కూడా ఒకటి. ఆయుర్వేద మందుల్లో ఈ తీగను విరివిగా వాడతారు. ఇవి గ్రామాల్లో ఇంటి పరిసరాల్లోనే పెరుగుతుంది. రోగ నిరోధక శక్తిని పెంచేందుకు ఈ తీగ బాగా ఉపయోగపడుతుందని ఆరోగ్య నిపుణులు చెబుతారు. తిప్పతీగను ఆంగ్ల భాషలో గిలోయ్ అని.. సంస్కృతంలో అమృత అని పిలుస్తారు. ఇది అన్నికాలాల్లోనూ పచ్చగా ఉండి చెట్లపైకి ఎగబాకుతుంది. తిప్పతీగ కాండం, కొమ్మ ఎక్కువగా వ్యాధులలో ఉపయోగిస్తారు.
తిప్పతీగ వల్ల కలిగే ప్రయోజనాలు..
తిప్పతీగలో యాంటీ ఆక్సిడెంట్, యాంటీ ఇన్ ఫ్లమేటరీ లక్షణాలు పుష్కలంగా ఉన్నాయి. రోజుకు రెండు ఆకులను నమిలితే మంచిదేనని ఆయుర్వేద నిపుణులు చెబుతున్నారు. తిప్పతీగతో జ్యూస్, పౌడర్, కాప్సూల్స్ తయారు చేసి అమ్ముతారు. రోగ నిరోధక శక్తి మెండుగా ఉండటంతో కరోనా నుంచి ఇది రక్షణ కల్పిస్తుందని నిపుణులు చెబుతున్నారు. సీజన్ లో వచ్చే జ్వరాలు, వ్యాధులు, ఇన్ఫెక్షన్ నుంచి రక్షణ లభిస్తుంది. తిప్పతీగలో ఉండే యాంటీ బయోటిక్, యాంటీ వైరల్, యాంటీ ఫంగస్ గుణాలు శరీరంలో చేరే సూక్ష్మ క్రిములను నాశనం చేస్తాయి. తిప్పతీగ ఆకుల పొడిని బెల్లంలో కలుపుకుని ప్రతిరోజు తీసుకుంటే.. అజీర్తి తగ్గుతుంది. జీర్ణ వ్యవస్థ పని తీరు మెరుగు పడుతుంది.
డయాబెటిస్ ఉన్నవారు తిప్పతీగగ చూర్ణాన్ని నిత్యం ఉదయం, సాయంత్రం తీసుకుంటే రక్తంలో గ్లూకోజ్ స్థాయిలను తగ్గించుకోవచ్చు. ఒత్తిడి, మానసిక ఆందోళనలతో సతమతం అయ్యేవారు తిప్పతీగ చూర్ణాన్ని రోజు తీసుకుంటే ఫలితం ఉంటుంది. జ్ఞాపకశక్తి కూడా పెరుగుతుంది. జలుబు, దగ్గు, టాన్సిల్స్ తదితర శ్వాసకోశ సమస్యలు ఉన్నవారు తిప్పగీత చూర్ణాన్ని వాడితే ఫలితం ఉంటుంది. గోరు వెచ్చని పాలలో కొద్దిగా తిప్ప గీత చూర్ణం, అల్లం రసం కలిపి రోజూ రెండు పూటలా తాగుతుంటే కీళ్ల నొప్పులు తగ్గుతాయి. సీజనల్ వ్యాధులు విష జ్వరాలైన డెంగ్యూ, స్వైన్ ఫ్లూ మలేరియా వంటి వాటిని పూర్తిగా నివారించగల శక్తి తిప్పతీగకు ఉంటుంది. హెపటైటిస్, ఆస్తమా, జ్వరం, డయాబెటిస్, గుండె సంబంధిత రోగాలను నయం చేయడంలో ఇది కీలకంగా పని చేస్తుంది. తిప్పతీగ పొడిని వేడి పాలలో కలుపుకుని తాగితే కీళ్ల నొప్పుల నుంచి ఉపశమనం లభిస్తుంది. ముఖంపై మచ్చలు, మొటిమలు మాత్రమే కాదు వృద్దాప్య ఛాయలు రాకుండా చేయగల గుణాలు వీటిలో ఉన్నాయి.
