కులగణనతో బీసీలకు మోసం చేసారు
రాష్ట్రంలో కులగణనను తప్పుగా నిర్వహించడంతో బీసీల సంఖ్య కృత్రిమంగా తగ్గిపోయిందని తెలంగాణ జాగృతి అధ్యక్షురాలు కల్వకుంట్ల కవిత విమర్శించారు. ఈ సందర్భంగా బుధవారం ఆమె మీడియాతో మాట్లాడుతూ, జిల్లాల వారీగా ప్రభుత్వం విడుదల చేసిన కులగణనలో బీసీల జనాభా గణనీయంగా తగ్గించి చూపించారని ఆమె ఆరోపించారు.
మహబూబాబాద్ జిల్లాలో గతంలో 9 శాతం ఉన్న బీసీ జనాభా ఇప్పుడు కాంగ్రెస్ పాలనలో 4 శాతానికి పడిపోవడం ఆశ్చర్యకరమని ఆమె ప్రశ్నించారు. ములుగు, మహబూబాబాద్ జిల్లాలకు సంబంధించిన గణాంకాలే ప్రభుత్వం బీసీ జనాభాను 5–6 శాతం మేర తగ్గించినట్టు స్పష్టం చేస్తున్నాయని పేర్కొన్నారు.
ఆదిలాబాద్‌లో 205 గ్రామాల్లో 5 మాత్రమే నాన్-షెడ్యూల్డ్ ఏరియాలు ఉన్నప్పటికీ, 2019లో 47 గ్రామాలకు బీసీ రిజర్వేషన్లు ఇవ్వబడ్డాయని కవిత గుర్తుచేశారు. ప్రస్తుతం గ్రామాల సంఖ్య పెరిగినా, రిజర్వేషన్లు మాత్రం 23 గ్రామాలకే ఇవ్వడం, బీసీల సంఖ్యను లెక్కల్లో సగానికి సగం తగ్గించారనే అంశాన్ని స్పష్టంగా చూపిస్తోందన్నారు. ఆసిఫాబాద్‌లో కూడా ఇదే పరిస్థితి కనిపిస్తుందని కవిత తెలిపారు. 2019లో 33 గ్రామాలకు రిజర్వేషన్లు ఉన్నప్పటికీ, ఇప్పుడు 20 గ్రామాలకే రిజర్వేషన్లు రావడం ప్రభుత్వం అందిస్తున్న గణాంకాలు తప్పేనని ఆమె అన్నారు.
రాష్ట్రంలో మొత్తం 12,735 గ్రామ పంచాయతీలకు ఎన్నికలు జరగాల్సి ఉన్నప్పటికీ, ఏజెన్సీ ప్రాంతాలను తీసివేయడంతో 10,223 గ్రామ పంచాయతీలకు మాత్రమే ఎన్నికలు జరుగుతున్నాయని, వాటిలో 2,176 గ్రామ పంచాయతీలకు మాత్రమే బీసీ రిజర్వేషన్లు ఇవ్వడం అత్యంత అన్యాయమని కవిత విమర్శించారు. 42 శాతం రిజర్వేషన్లలో ఇది సగం మాత్రమేనని, అదే సంఖ్యలో మరో 2,176 గ్రామ పంచాయతీలకు రిజర్వేషన్లు ఇవ్వాల్సిన బాధ్యత ప్రభుత్వంపై ఉందన్నారు.
2011 గణాంకాలను ఆధారంగా తీసుకుని ఎస్సీ, ఎస్టీలకు రిజర్వేషన్లు ఇస్తూ, బీసీల విషయంలో మాత్రం తాజా కులగణనను ఆధారంగా తీసుకోవడం సరికాదని ఆమె పేర్కొన్నారు. సోషియో–ఎకనామిక్ సర్వే ఆధారంగా రిజర్వేషన్లు చేసినట్లయితే కొత్తగూడెం జిల్లాలో 25 గ్రామాలలో సగానికి సగం బీసీలకు రిజర్వేషన్లు రావాల్సి ఉంటుందని వివరించారు.
మంత్రుల ఆదేశాల ప్రకారం ఎవరికి చెప్పినా వారికే రిజర్వేషన్లు ఇస్తున్నారని కవిత మండిపడ్డారు. రాష్ట్రంలో రిజర్వేషన్లు రాజ్యాంగబద్ధంగా జరుగుతున్నాయా, లేక ముఖ్యమంత్రి నిర్ణయాల ప్రకారం సాగుతున్నాయా అన్న విషయంపై రాహుల్ గాంధీ తెలంగాణ ప్రజలకు సమాధానం చెప్పాలని ఆమె డిమాండ్ చేశారు.
