రిటైర్ మెంట్ ప్లానింగ్ లో ఈ తప్పులు చేస్తున్నారా?

పదవీ విరమణ అనేది జీవితంలో ఒక కీలకమైన మలుపు. ఉద్యోగ బాధ్యతలు తీర్చుకుని, ఇకపై తమకు నచ్చిన అలవాట్లు, పనులను తీరికగా చేసుకోవడానికి ఈ సమయాన్ని ఉపయోగించుకోవాలి. అయితే ఉద్యోగంలో ఉన్నప్పుడు చేసే కొన్ని తప్పులు రిటైర్ మెంట్ జీవితాన్ని ప్రభావితం చేస్తాయి. అలా కాకుండా హాయిగా రిటైర్ అవడం ముఖ్యం.
లేటుగా ప్రారంభించడం : చాలామంది చేసే అతిపెద్ద తప్పు.. రిటైర్ మెంట్ ప్లానింగ్ ను త్వరగా ప్రారంభించపోవడం. ‘ఇంకా చాలా సమయం ఉంది కదా.. అప్పుడే తొందరేముంది’ అని అనుకుంటూ పొదుపును వాయిదా వేస్తారు. కానీ పెట్టుబడి, రాబడికి సంబంధించి సమయం అనేది అత్యంత శక్తివంతమైన ఆస్తి. చిన్న మొత్తంలో అయినా త్వరగా పెట్టుబడి పెట్టడం వల్ల రాబడి వస్తుంది. ఆలస్యంగా మొదలుపెడితే కావల్సిన లక్ష్యాలను చేరుకోలేరు.
భవిష్యత్తులో ధరలపై అవగాహన లేకపోవడం : రిటైర్ అయ్యే సమయానికి ఎలాంటి జీవనశైలిని కొనసాగించాలనుకుంటున్నారు? అలా జీవించాలంటే ఎంత డబ్బు అవసరమవుతుంది? అనేదానిపై అవగాహన లేకపోవడం మరో పెద్ద తప్పు. ద్రవ్యోల్బణం పెరుగుతూనే ఉంటుంది. దానిని పరిగణనలోకి తీసుకోకుండా లక్ష్యాన్ని అంచనా వేయడం వల్ల అవసరమైన మొత్తం కంటే తక్కువ పొదుపు చేసే ప్రమాదం ఉంది.
ఆరోగ్యంపై అంచనా : పెద్ద వయసులో ఆరోగ్య సంరక్షణ ఖర్చులు పెరుగుతాయి. చాలా మంది ఆరోగ్య ఖర్చులను పట్టించుకోరు. ఊహించని వైద్య అత్యవసర పరిస్థితులు మీ పొదుపు మొత్తాన్ని క్షణాల్లో ఖర్చు చేస్తాయి. అందుకే రిటైర్మెంట్ ప్రణాళికలో భాగంగా సరైన ఆరోగ్య బీమా తీసుకోవడం, వైద్య ఖర్చుల కోసం ప్రత్యేకంగా కొంత మొత్తాన్ని కేటాయించడం చాలా అవసరం.
ద్రవ్యోల్బణం చూసుకోకపోవడం : నెలకు ఇప్పుడు అయ్యే ఖర్చులు 20 ఏళ్ల తర్వాత కూడా అలాగే అవుతాయనుకోవడం పొరపాటు. ద్రవ్యోల్బణం కాలక్రమేణా డబ్బు విలువను హరిస్తుంది. ద్రవ్యోల్బణాన్ని తక్కువ రాబడిని ఇచ్చే సంప్రదాయ బ్యాంక్ ఫిక్స్‌డ్ డిపాజిట్లు మాత్రమే ఎదుర్కోలేవు. అందుకే ద్రవ్యోల్బణాన్ని మించి రాబడిని ఇచ్చే ఈక్విటీ, మ్యూచువల్ ఫండ్స్ వంటి వాటిలో కూడా పెట్టుబడులు పెట్టాలి.
అప్పులను తీర్చకుండా రిటైర్ మెంట్ :రిటైర్ మెంట్ నాటికి ఎలాంటి రుణాలు లేకుండా చూసుకోవాలి. వ్యక్తిగత రుణాలు, క్రెడిట్ కార్డుల అప్పులు ఉండకూడదు. ఈఎంఐలు రిటైర్ మెంట్ నిధిపై ప్రభావం చూపకుండా జాగ్రత్త వహించాలి. అందుకే రిటైర్ మెంట్ కు ముందుగానే అన్ని రుణాలు తీర్చేయడం ముఖ్యం.