భారత్–అమెరికా వాణిజ్య ఒప్పంద చర్చలు వేగవంతం

భారత్‌–అమెరికా ద్వైపాక్షిక వాణిజ్య సంబంధాలు కొత్త దశలోకి అడుగుపెడుతున్నాయి. ప్రతిపాదిత ద్వైపాక్షిక వాణిజ్య ఒప్పందం పై కీలక చర్చల కోసం భారత సీనియర్‌ అధికారిక బృందం ఈ వారం అమెరికా పర్యటనకు వెళ్లనుంది. ఈ పర్యటనలో ఇరుదేశాల మధ్య నిలకడైన వాణిజ్య విధానాలు, సుంకాల తగ్గింపు, మార్కెట్‌ ప్రవేశ పరిమితుల సడలింపులపై చర్చలు జరగనున్నాయి.

ఈ ఏడాది ఫిబ్రవరిలో భారత్‌, అమెరికా ఈ ఒప్పందంపై చర్చలను ప్రారంభించాలని నిర్ణయించుకున్నాయి. షెడ్యూల్‌ ప్రకారం తొలి దశ చర్చలు అక్టోబర్‌, నవంబర్‌ నెలల్లో పూర్తవ్వాల్సి ఉంది. ఇప్పటి వరకు మొత్తం ఐదు దశల చర్చలు పూర్తి కాగా, ఇరుదేశాలు నిర్మాణాత్మక పురోగతిని సాధించాయని అధికార వర్గాలు తెలిపాయి.

గత నెలలో వాణిజ్యశాఖ మంత్రి పీయూష్‌ గోయల్‌ అధికార ప్రతినిధి బృందంతో కలిసి న్యూయార్క్‌ పర్యటించారు. ఆ సందర్భంగా అమెరికా వాణిజ్య ప్రతినిధి (USTR) జెమిసన్‌ గ్రీర్, భారతదేశానికి అమెరికా రాయబారిగా నియమితుడైన సెర్జియో గోర్‌తో సమావేశమయ్యారు. ఈ సమావేశంలో ఇరుపక్షాలు పరస్పర ప్రయోజనకరమైన ఒప్పందాన్ని త్వరగా పూర్తిచేయాలని అంగీకరించాయి.

రష్యా నుంచి ముడి చమురు కొనుగోలు చేసినందుకు అమెరికా, భారతదేశంపై ఆర్థిక పరిమితులు విధించింది. అమెరికా మార్కెట్‌లోకి ప్రవేశించే భారత వస్తువులపై 25 శాతం పరస్పర సుంకం, అదనంగా 25 శాతం ప్రత్యేక పన్ను విధించడంతో ప్రస్తుతం మొత్తం 50 శాతం అదనపు దిగుమతి సుంకం అమల్లో ఉంది. ఈ భారాన్ని తగ్గించేందుకు భారత్‌ ఈ చర్చల్లో సడలింపులు కోరే అవకాశం ఉంది.

ప్రస్తుతం భారత్‌–అమెరికా ద్వైపాక్షిక వాణిజ్య విలువ 191 బిలియన్‌ డాలర్లుగా ఉంది. ఈ ఒప్పందం కుదిరితే 2030 నాటికి 500 బిలియన్‌ డాలర్లకు పెంచాలనే ఉద్దేశ్యంతో రెండు దేశాలు ముందుకు సాగుతున్నాయి.
సుంకాల తగ్గింపుతో భారత ఎగుమతులకు కొత్త అవకాశాలు లభించే అవకాశం.అమెరికా మార్కెట్లో “Made in India” ఉత్పత్తులకు ప్రాధాన్యం పెరగనుంది.టెక్నాలజీ, ఎలక్ట్రానిక్స్‌, ఔషధ ఉత్పత్తులు, నూతన శక్తి రంగాలు చర్చల కేంద్రంగా ఉండనున్నాయి.వాణిజ్య వివాదాల పరిష్కారం కోసం శాశ్వత మెకానిజం ఏర్పాటు ప్రతిపాదనపై చర్చలు జరగనున్నాయి.ఈ పర్యటనతో భారత్–అమెరికా వాణిజ్య సంబంధాలు కొత్త దశలోకి వెళ్లే అవకాశముందని వాణిజ్య మంత్రిత్వ శాఖ ఆశాభావం వ్యక్తం చేసింది. “ఇరుదేశాలకూ ప్రయోజనకరమైన ఒప్పందం దిశగా చర్చలు సానుకూలంగా సాగుతున్నాయి” అని మంత్రిత్వ శాఖ వర్గాలు వెల్లడించాయి.