సిక్కింలో ఘోర ప్రమాదం.. 16 మంది జవాన్ల మృతి

ఉత్తర సిక్కింలో చైనా సరిహద్దులకు సమీపంలో ఘోర ప్రమాదం సంభవించింది. జవాన్లు ప్రయాణిస్తున్న వాహనం లోయలోపడి 16 మంది దుర్మరణం చెందారు. వారిలో 13 మంది జవాన్లు కాగా, ముగ్గురు జూనియర్‌ కమిషన్డ్‌ అధికారులు ఉన్నారు. నలుగురు తీవ్రంగా గాయపడగా వారి హెలికాప్టర్‌లో బెంగాల్‌లోని ఆసుపత్రికి తరలించారు. ఉత్తర సిక్కింలోని జెమా ప్రాంతంలో ఈ ప్రమాదం చోటు చేసుకుంది. ఈ ఘటన జరిగిన సమయంలో మిలిటరీ ట్రక్కులో 20 మంది ఉన్నారు. వారు ప్రయాణిస్తున్న వాహనం మలుపు వద్ద వాహనం అదుపు తప్పి లోయలో పడిపోయినట్టు భావిస్తున్నారు. 100 అడుగుల ఎత్తు నుంచి వాహనం లోయలో పడిపోవడంతో నుజ్జునుజ్జుయింది. సమాచారం అందుకున్న వెంటనే అధికారులు, పోలీసులు సంఘటన స్థలానికి చేరుకుని సహాయ చర్యలు ప్రారంభించారు. ఈ విషాద ఘటనపై కేంద్ర మంత్రి రాజ్‌నాథ్‌ సింగ్‌ తీవ్ర విచారం వ్యక్తం చేశారు. వారి కుటుంబాలకు ప్రగాఢ సానుభూతి తెలియజేశారు.