మద్రాసు హైకోర్టుకు జస్టిస్ దేవానంద్, జస్టిస్ నాగార్జున బదిలీ

తెలంగాణ హైకోర్టు జస్టిస్ డి నాగార్జున, ఆంధ్రప్రదేశ్ హైకోర్టు న్యాయమూర్తి బట్టు దేవానంద్‌లు, మద్రాసు హైకోర్టులో బాధ్యతలు స్వీకరించాలని కేంద్ర న్యాయ మంత్రిత్వ శాఖ గురువారం విడుదల చేసిన నోటిఫికేషన్ ద్వారా కోరింది. నవంబర్ 24, 2022న సుప్రీంకోర్టు కొలీజియం చేసిన సిఫారసు మేరకు ఆంధ్రప్రదేశ్ హైకోర్టు నుండి జస్టిస్ బట్టు దేవానంద్, తెలంగాణ హైకోర్టు నుండి జస్టిస్ దేవరాజు నాగార్జునను మద్రాసు హైకోర్టుకు బదిలీ చేస్తూ కేంద్రం గురువారం నోటిఫికేషన్ జారీ చేసింది.

జస్టిస్ బట్టు దేవానంద్
జస్టిస్ దేవానంద్ ఏప్రిల్ 14, 1966న ఆంధ్రప్రదేశ్‌లోని కృష్ణా జిల్లా గుడివాడ పట్టణంలో ప్రభుత్వ పాఠశాల ఉపాధ్యాయులు దంపతులకు జన్మించారు. ప్రాథమిక పాఠశాల విద్యను పంచాయతీ ప్రాథమిక పాఠశాలలో, ఉన్నత పాఠశాల విద్యను మున్సిపల్ పాఠశాలలో అభ్యసించాడు. A.N.R వద్ద బ్యాచిలర్ డిగ్రీ చదువుతున్నప్పుడు… 1984-85లో విద్యార్థి సంఘం అధ్యక్షుడిగా వ్యవహరించారు. జూలై 6, 1989న ఆంధ్ర ప్రదేశ్ బార్ కౌన్సిల్‌లో ప్రవేశించారు. విశాఖపట్నంలోని కోర్టులలో ప్రాక్టీస్ చేశారు. ప్రాక్టీస్‌ను AP హైకోర్టుకు మార్చిన తర్వాత 1996 నుండి 2000 వరకు అసిస్టెంట్ ప్రభుత్వ ప్లీడర్‌గా పనిచేశారు. జనవరి 13, 2020న ఏపీ హైకోర్టు న్యాయమూర్తిగా పదోన్నతి పొందారు.

జస్టిస్ నాగార్జున
జస్టిస్ నాగార్జున ఆగస్టు 15, 1962న తెలంగాణలోని ఉమ్మడి మహబూబ్ నగర్ జిల్లాలో జన్మించారు. వనపర్తి పట్టణంలోని RLD కళాశాలలో సైన్స్ కోర్సును అభ్యసించారు. గుల్బర్గాలోని ఎస్‌ఎస్‌ఎల్ లా కాలేజీ నుండి లా డిగ్రీని పొందారు. 1986లో బార్ కౌన్సిల్‌లో చేరారు. పదవీకాలంలో 2002 – 2004 వరకు బెర్క్లీలోని యూనివర్సిటీ ఆఫ్ కాలిఫోర్నియాలో అంతర్జాతీయ సంఘర్షణ పరిష్కారంలో పరిశోధన కోసం స్కాలర్‌షిప్ లభించింది. న్యాయశాస్త్రంలో మాస్టర్స్ డిగ్రీని కూడా పొందారు. హైదరాబాద్‌లోని నల్సార్ యూనివర్శిటీ ఆఫ్ లా డాక్టరేట్ చేశారు. 2010లో జిల్లా జడ్జిగా పదోన్నతి పొందిన నాగార్జున 2021 అక్టోబర్‌లో ఆంధ్రప్రదేశ్ హైకోర్టు రిజిస్ట్రార్ జనరల్‌గా బాధ్యతలు స్వీకరించారు. మార్చి 24, 2022న తెలంగాణ హైకోర్టు న్యాయమూర్తిగా పదోన్నతి పొంది, ఇప్పుడు మద్రాసు హైకోర్టుకు బదిలీ అయ్యారు.