వాళ్లిద్దరూ వరల్డ్ కప్ ఆడతారు

రాంచీలో జరిగిన తొలి వన్డేలో రోహిత్‌ శర్మ–విరాట్‌ కోహ్లీ జోడీ చూపిన అద్భుత ప్రదర్శన క్రికెట్‌ వర్గాల్లో విశేష చర్చనీయాంశమైంది. ఈ మ్యాచ్‌లో కోహ్లీ 137 పరుగులతో భారీ సెంచరీ కొట్టగా, రోహిత్‌ శర్మ 57 పరుగులతో ఆకట్టుకున్నాడు. వీరిద్దరి మధ్య రెండో వికెట్‌కు 109 బంతుల్లో 136 పరుగుల భాగస్వామ్యం అందరినీ మెప్పించింది. పవర్‌ప్లేలోనే 80 పరుగులు రాబట్టిన ఈ జోడీ ధాటికి భారత్‌ నిర్ణీత 50 ఓవర్లలో 349 పరుగులు చేసింది. తర్వాత ఆఫ్రికా జట్టు 77/4 పరిస్థితి నుంచి బాగా పుంజుకున్నా చివరికి 332 పరుగులకే ఆలౌటై 17 పరుగుల తేడాతో ఓడిపోయింది. దీంతో భారత్‌ సిరీస్‌లో 1–0 ఆధిక్యం సంపాదించింది.
ఈ నేపథ్యంలో టీమ్‌ఇండియా మాజీ క్రికెటర్‌ కృష్ణమాచారి శ్రీకాంత్‌ ధైర్యంగా ఒక కీలక వ్యాఖ్య చేశాడు. రోహిత్‌ శర్మ, విరాట్‌ కోహ్లీ 2027 వన్డే వరల్డ్‌కప్‌లో ఖచ్చితంగా ఆడతారని, వారిద్దరూ లేకుండా ఆ టోర్నమెంట్‌కు సంబంధించిన ప్రణాళికలకు అర్థమే లేదని స్పష్టం చేశాడు. తన యూట్యూబ్‌ ఛానల్‌లో మాట్లాడుతూ, “రోహిత్‌, కోహ్లీ ఇద్దరూ కేవలం పరుగులే చేయడం కాదు, ఫిట్‌నెస్‌ విషయంలో కూడా అపారమైన శ్రద్ధ చూపుతున్నారు. ప్రస్తుతం వారు ఒకే ఫార్మాట్‌ ఆడుతున్నప్పటికీ ఫామ్‌ను అద్భుతంగా కొనసాగిస్తున్నారు. వారిద్దరూ 20 ఓవర్లపాటు క్రీజులో ఉంటే ప్రత్యర్థులకు ఎలాంటి అవకాశాలు ఉండవు. రాంచి వన్డేలోనూ అదే నిరూపితమైంది. వారిలాంటి అనుభవజ్ఞులు లేకుండా భారత్‌ 2027 వరల్డ్‌కప్‌ను గెలవడం కష్టమే” అని పేర్కొన్నాడు. శ్రీకాంత్‌ అభిప్రాయం ప్రకారం రోహిత్‌ శర్మ, విరాట్‌ కోహ్లీ వరల్డ్‌కప్‌ కోసం ఇప్పటికే 1 మరియు 3 స్థానాలకు అర్హులైన బ్యాట్స్‌మెన్‌గా తమను తాము నిలబెట్టుకున్నారు. వారిద్దరి స్థిరత్వం, మ్యాచ్‌ను చదివే సామర్థ్యం, ఒత్తిడిని తట్టుకునే నైపుణ్యం టీమ్‌ఇండియాకు అత్యంత కీలకమని ఆయన విశ్లేషించాడు. రాంచి వన్డేలో వారి జోడీ చూపిన ప్రదర్శన తదుపరి సంవత్సరాల్లోనూ భారత క్రికెట్‌ బలం ఎలా ఉండబోతోందో ముందుగానే తెలిపిందని శ్రీకాంత్‌ అభిప్రాయపడ్డాడు.