బీసీలకు ప్రభుత్వం క్షమాపణ చెప్పాలి

. బీజేపీ ఎంపీ ఈటల రాజేందర్ డిమాండ్

బీసీలతో కాంగ్రెస్ ప్రభుత్వం చెలగాటమాడుతోందని మల్కాజిగిరి ఎంపీ, బీజేపీ నేత ఈటల రాజేందర్ తీవ్రంగా విమర్శించారు. హనుమకొండలో శుక్రవారం నిర్వహించిన మీడియా సమావేశంలో ఆయన మాట్లాడుతూ , రిజర్వేషన్లపై వెనక్కి తగ్గినందుకు ప్రజలకు క్షమాపణలు చెప్పాలని అధికార కాంగ్రెస్ పార్టీ నేతలను ఆయన డిమాండ్ చేశారు. తమకు అన్యాయం చేసినందుకు కాంగ్రెస్ ప్రభుత్వంపై బీసీలు కత్తులు నూరుతున్నారన్నారు.ఓట్ల కోసం కాంగ్రెస్ నాయకులు రాజకీయ నాటకాలు ఆడుతున్నారని మండిపడ్డారు . తమపై జరిగిన అన్యాయంతో బీసీ సమాజం తీవ్ర ఆగ్రహంతో ఉన్నదని, కాంగ్రెస్ ప్రభుత్వంపై నిరసనకు సిద్ధమవుతోందని చెప్పారు.

పంచాయతీ ఎన్నికల్లో సర్పంచ్ అభ్యర్థులకు గుర్తులు లేకపోవడం ద్వారా, గెలిచిన వారిని కాంగ్రెస్ నుంచి గెలిచినట్టుగా చూపించేందుకు ప్రభుత్వం ప్రయత్నిస్తోందన్న అనుమానం వ్యక్తం చేశారు. అయితే కాంగ్రెస్ చేసిన మోసానికి బీసీలు తీవ్రంగా ప్రతిస్పందించేందుకు సన్నద్ధంగా ఉన్నారని స్పష్టం చేశారు. కేంద్రంలో బీజేపీ అధికారంలో ఉన్నప్పుడు, హామీలు ఇస్తూ ఆ విషయాన్ని పట్టించుకోకపోవడం కాంగ్రెస్ నాయకుల ద్వంద్వ వైఖరిని బయటపెడుతోందని విమర్శించారు.

బీసీల జనాభా వివరాలు తేల్చకుండా రిజర్వేషన్లు ఎలా నిర్ణయిస్తారని ఆయన ప్రశ్నించారు.
హైదరాబాద్‌లో గతంలో బీఆర్ఎస్ భూములు లాక్కున్నట్లే, ఇప్పుడు కాంగ్రెస్ పార్టీ కూడా భూముల ఆక్రమణలో దిగజారిందని ఈటల ఆరోపించారు. కాంగ్రెస్ భూకుంభకోణాలకు హద్దులు లేకుండా పోయాయని, దీనికి తప్పకుండా మూల్యం చెల్లించాల్సి వస్తుందని హెచ్చరించారు. మల్కాజిగిరి నియోజకవర్గంలో విస్తృతంగా భూములు లాక్కుంటున్న నేపథ్యంలో, భూముల కోసమే జీహెచ్‌ఎంసీ పరిధిని విస్తరించారా? అని ఆగ్రహం వ్యక్తం చేశారు. అలా అయితే అది ప్రభుత్వ పరిపాలనలో అత్యంత దారుణమైన నిర్ణయమని ఈటల రాజేందర్ వ్యాఖ్యానించారు.