ఘనంగా వెంకటేష్ రెండో కుమార్తె నిశ్చితార్థం.. హాజరైన సినీ నటులు

టాలీవుడ్ హీరో వెంకటేష్ ద్వితీయ కుమార్తె నిశ్చితార్థం ఘనంగా చేశారు. సినీ పరిశ్రమలో ప్రముఖులు హాజరై కాబోయే వధూవరులను దీవించారు.

హైదరాబాద్: టాలీవుడ్ హీరో వెంకటేష్ ఇంట్లో త్వరలోనే పెళ్లిబాజాలు మోగనున్నాయి. ఆయన రెండో కుమార్తె హయ వాహిని నిశ్చితార్థం బుధవారం గ్రాండ్‌గా చేశారు. విజయవాడకు చెందిన ఓ డాక్టర్ కుమారుడితో వెంకటేష్ స్వగృహంలోనే ఈ వేడుక జరిగింది. వచ్చేఏడాది ఈ జంట పెళ్లి బాజాలు మ్రోగనున్నాయి. ఇక ఈ వేడుకకు టాలీవుడ్‌కు చెందిన పలువురు సినీ ప్రముఖులు హాజరయ్యారు. చిరంజీవి, మహేష్ బాబు, రానా, నాగచైతన్య ఈ నిశ్చితార్థానికి హాజరై కాబోయే వధూవరులను దీవించారు. ప్రస్తుతం దీనికి సంబంధించిన ఫొటోలు సోషల్ మీడియాలో వైరలవుతున్నాయి.

ఇక వెంకటేష్, నీరజ దంపతులకు నలుగురు పిల్లలు. ఆశ్రిత, హయ వాహిని, భావనతో పాటు కుమారుడు అర్జున్ ఉన్నారు. పెద్దకుమార్తె పెళ్లి 2019లో జరిగింది. ప్రస్తుతం ఆమె విదేశాల్లో ఉంటున్నారు. ఇక సినిమాల విషయానికి వస్తే.. వెంకటేష్ సైంధవ్ సినిమాతో బిజీ అయ్యారు. శైలేష్ కొలను దర్శకత్వంలో యాక్షన్ ఎంటర్‌టైనర్‌గా ఈ సినిమా వస్తుంది. దీన్ని వచ్చే ఏడాది సంక్రాంతికి రిలీజ్ అయ్యేలా ప్లాన్ చేస్తున్నారు.