లిక్కర్ స్కామ్లో విజయసాయిరెడ్డికి ఈడీ ఉచ్చు
ఆంధ్రప్రదేశ్లో గత ప్రభుత్వ హయాంలో జరిగిన బహుళ కోట్ల మద్యం కుంభకోణం కేసులో ఎన్ఫోర్స్మెంట్ డైరెక్టరేట్ దర్యాప్తును వేగవంతం చేసింది. ఈ కేసులో కీలక మలుపుగా వైసీపీ మాజీ రాజ్యసభ సభ్యుడు విజయసాయిరెడ్డికి ఈడీ అధికారులు సమన్లు జారీ చేశారు. ఈ నెల 22వ తేదీన విచారణకు హాజరుకావాలని అధికారులు ఆదేశించారు. ఇప్పటికే రాష్ట్ర సీఐడీ సేకరించిన సాక్ష్యాల ఆధారంగా ఇప్పుడు ఈడీ మనీ లాండరింగ్ కోణంలో లోతైన విచారణ జరిపేందుకు సిద్ధమైంది.
గత వైఎస్సార్సీపీ ప్రభుత్వ హయాంలో మద్యం విధానాల రూపకల్పన, డిస్టిలరీల నుండి ముడుపుల సేకరణ వంటి అంశాలపై రాష్ట్ర ప్రభుత్వం ఏర్పాటు చేసిన సిట్ ఇప్పటికే కీలక ఆధారాలు సేకరించింది. ఈ కేసులో తొలుత తాను ఒక ‘విజిల్ బ్లోయర్’నని ప్రకటించుకున్న విజయసాయిరెడ్డి, ఈ స్కామ్ వెనుక ఉన్న అసలు వ్యక్తులను పట్టిస్తానని పేర్కొన్నారు. సీఐడీ విచారణలో రాజ్ కెసిరెడ్డిని ప్రధాన సూత్రధారిగా పేర్కొంటూ కీలక వాంగ్మూలం కూడా ఇచ్చారు. అయితే, దర్యాప్తులో తేలిన ఇతర ఆధారాల మేరకు సీఐడీ ఆయన్ను సాక్షి నుంచి నిందితుడి జాబితాలోకి చేర్చడం గమనార్హం.
మద్యం కుంభకోణంలో జరిగిన భారీ ఆర్థిక లావాదేవీలపై ఈడీ ఇప్పుడు ప్రత్యేక దృష్టి సారించింది. మద్యం కంపెనీల నుండి సేకరించిన దాదాపు ₹3,500 కోట్ల ముడుపులను హవాలా మార్గాల ద్వారా విదేశాలకు లేదా ఇతర రాష్ట్రాలకు తరలించినట్లు ఈడీ గట్టిగా అనుమానిస్తోంది. మద్యం సరఫరాదారులు మరియు డిస్టిలరీల నుండి 15% నుండి 20% వరకు కమీషన్లు వసూలు చేశారనే ఆరోపణలపై సాయిరెడ్డిని అధికారులు ప్రశ్నించనున్నారు. అలాగే, మద్యం పాలసీ రూపకల్పనలో విజయసాయిరెడ్డి నివాసంలోనే కీలక సమీక్షా సమావేశాలు జరిగాయని సిట్ ఇప్పటికే అభియోగాలు మోపింది.
తాజాగా విజయసాయిరెడ్డికి ఈడీ సమన్లు అందడంతో రాష్ట్ర రాజకీయాల్లో పెను ప్రకంపనలు మొదలయ్యాయి. ఈ కేసులో ఇప్పటికే పెద్దిరెడ్డి మిథున్ రెడ్డి, మాజీ ఐఏఎస్ అధికారి ధనంజయ్ రెడ్డి వంటి కీలక వ్యక్తుల పేర్లు వెలుగులోకి రాగా, ఇప్పుడు దర్యాప్తు నేరుగా సాయిరెడ్డి వద్దకు చేరింది. ఈ నెల 22న జరిగే విచారణ తర్వాత ఈడీ ఎలాంటి చర్యలు తీసుకుంటుందోనని, ఆయన అరెస్ట్ అయ్యే అవకాశం ఉందా అనే ఉత్కంఠ సర్వత్రా నెలకొంది.
